Ajansê Xeberan yê Firatî (ANF) ke bi xeylê lehçe û ziwanan sey vengê şaran yeno zanayene, 15ê êlule de beşe kirmanckî zî akerdbi û na gama erjaye seba kirmancan bîye sebebê şayîyêka girde.

Rojnamegere Ulkem Zeremya zî bi mesajêk seba abîyayîşê beşê kirmanckî yê ANFyî keyfweşîya xo arde ziwan û na gama erjaye bimbarek kerde.

Mesajê Ulkem Zeremya wina yo:

“Abîyayîşê beşe kirmanckî yê ANFyî seba ziwanê ma kirmanckî gamêka zaf erjaye yo. Na xebata ANFyî sey leteyêkê xoverdayîşê wayîrvejîyayîşê kirmanckî yo û tarîx de cayê xo gêna. Na gamêka zaf gird û tarîxî ya. Ziwan bi nuştiş û wendişî ganî maneno. Cok ra seba perwerdeyê ziwanê ma çîyeko zaf muhîm o. Dewlete bi polîtîkaya asîmîlasyonî wazena ke ziwanê ma binate ra wedarna û ma çin bikera. Yeno zanayene ke JIYAN TV ke kirmanckî weşan kerdêne, hetê dewlete ra ame qefilnayene. Rixmê heme qedexe û hêrişê dewlete, dewro peyên de seba cuyayîşê lehçeya kirmanckî xeylê xebatê erjayeyî ameyî viraştene. Nînan ra yewe zî xebata ANFyî ya. Seba na xebata erjaye ma zî înan bimbarek kenê û înan rê serkewtiş wazenê.”

Ulkem Zeremya seba paştîdayîşê servîs û ziwanê kirmanckî veng daye û waşte kewa heme kirmancî sey muxabîrêk bixebitî û beşê kirmackî yê ANFyî rê xeberan bişawî.