Namzetanê wekîlîye yê Erziromî yê Partîya Çep a Keske ra Merale Daniş Beştaş ANFyî rê derheqê weçînayîşan de tay ercnayîşî kerdî.

Beştaşe da zanayene ke îqtîdarê AKP-MHPyî nê 20 serran de welat visto mîyanê krîzan û vat: ''Nê welatî de asayîşê çewî çin o. Coka ganî ma nê îqtîdarî bişawê. No îqtîdar keno ke partîya ma bi hawayêkê bêusulî biqefilno. Şar hêrsbîyaye yo. Nê weçînayîşan de ma rê tewr zaf weçînayîşê Meclîsî girîng ê. Eke ma 100-120 wekîlîyan bigêrê do zaf hol bibo. Ganî ma îradeyê şarî bikirişê Meclîsî. Ganî ma bi hawayêkê xurtî bikewê Meclîsî.''

Beştaşe bale ante ser ke tecrîdê vera Rayberê Şarê Kurdî Abdullah Ocalanî huqûqîyêka tewr pîl a û vat: ''Ma nêzanenê ke Birêz Ocalan weş o yan nêweş o. Tecrîd şarî rê zî îşkence û ezîyet o. Birêz Ocalan verê cû çareserîya meseleya kurdan de bibi muxatabo verên û xêrê ey ra şar aram bibi. Tecrîd nameyê çaresernêkerdişê meseleya kurdan o.''

Beştaşe vist vîrî ke Erzirom de nasnameyê cîyayî est ê û vat: ''Ez zanena ke ma Erzirom de xurt ê. Dima ke namzetîya mi eşkera bîye Tirkîya, Erzirom û teberê welatî ra embazan mi rê telefon kerd. Ma îradeyê Erziromî Meclîs de bi hawayêkê xurtêrî temsîl bikerê.''