Bernameyê ÇEDESî bi protokolê Wezîrîya Perwerdeyê Milîyî, Wezîrîya Spor û Ciwanan û Serekîya Karanê Dîyanetî aktîf bi. Goreyê ÇEDESî wendekarî ganî goreyê 'erjanê exlaq, milî û dînîyan' bêrê weyekerdene. Çarçewa nê bernameyî de personelê Dîyanetî sey 'şewirmendanê manewîyan' dibistanan de erk bikerê. 

Sekretera Huqûqî ya TÎSî ya Egitim-Senî Mutluye Aymaz derheqê ÇEDESî de ANFyî rê qisey kerd.

Aymaze îfade kerd ke îqtîdarê AKP-MHPyî tedeyîya perwerdeyî goreyê ferasetê Îslamê sûnîyî dîyar keno û bi nê hawayî wazeno şeklêk bido domanan. Aymaze vat: ''Welat de bawerî û kulturê cîyayî est ê. La bi ferasetê Îslamê sûnîyî teyna yew bawerîye yena ferzkerdene. Bernameyê ÇEDESî do bibo sebebê cîyakerîyêka pîle.ÇEDES destpêk de 2021-2022 de dibistananê îmam-xetîban de amebi caardene, nika zî pêro dibistanan û lîseyan de do bêro cakerdene. Hetê bînî ra dibistan û lîseyanê taybetan de ÇEDES waştişê dadî-babîyan ser o do bêro dayene. Yanî no sîstem do tesîrê domananê şarî bikero ke nêeşkeno seba perwerdeyê taybetî pereyî bido.''

Aymaze da zanayene ke perwerde de cadayîşê îmaman goreyê eqlî nîyo û vat: ''Wezîfedarê Dîyanetî wayîrê formasyonê pedagojîkî bîyê. Statuyê mamostayan bi ÇEDESî dîyeno îmaman zî. Ez bi xo 26 serrî yo mamostatîye kena la hema zî xo rê persena ke gelo karê xo raşt kena yan ney. Nesl û mezgî vurîyenê, wendekarî cîya cîya yê. Perwerdeyo ke do îmaman bido, teyna xizmetê ney bikero ke îqtîdar goreyê waştişanê xo neslêkî awan bikero.''