Bernameyê ÇEDESî bi protokolê Wezîrîya Perwerdeyê Milîyî, Wezîrîya Spor û Ciwanan û Serekîya Karanê Dîyanetî aktîf bi. Goreyê ÇEDESî wendekarî ganî goreyê 'erjanê exlaq, milî û dînîyan' bêrê weyekerdene. Çarçewa nê bernameyî de personelê Dîyanetî sey 'şewirmendanê manewîyan' dibistanan de erk bikerê. 

Serekê Federasyonê Elewî-Bektaşîyan Mustafa Aslanî derheqê ÇEDESî de ANFyî rê qisey kerd.

Aslanî da zanayene ke ronîyayîşê Komara Tirkîya ra nata vera elewîyan bi destê Dîyanet û Wezîrîya Perwerdeyê Milîyî polîtîkayê asîmîlasyonî yenê caardene. Aslanî vist vîrî ke Mehkemeya Qanûnê Bingeyî (MQB) û Mehkemeya Heqanê Merdiman a Ewropa (MHME) dûştê bernameyê ÇEDESî bire dabî û vat: ''Çarçewa ÇEDESî de dibistanan rê îmamî yenê tayînkerdene. Bi qiseyê 'şêwirmendîya manewîye' mezgê wendekaran goreyê ferasetê tirk-sûnîyî bêrê dîzaynkerdene. 

Ma nimûneyanê Îzmîr û Konya yê ÇEDESî de dî ke binê nameyê 'zîyaretê mekananê fîrazan' de wendekarî teyna yenê berdene bi camîyan. Saetanê dersan de wendekarî yenê berdene bi nimajê îneyî û weazan. Rixmê biranê mehkemeyan zî dersê dînî nêameyî wedaritene û nika zî ÇEDES îlaweyê nê kerdişan bîyo. Ganî ma vera nê xîretê asîmîlasyonî zemînê komelkî de têkoşîn bikerê.''