Qezaya Payîzava ya Wanî de 2017 de prosesêkê mehkeme de vejîya werte de vera kurdan huqûqêko senîn yeno kerdene. Bi zabitnameyanê sexteyan 2 kurdî serrêke zîndan de mendî û dima vera dîyayî.

14ê gulana 2017î de deweka Taşlica ya taxa Oguldamî ya Payîzava de hêzanê HPGyî qoricîyan ser de mayînêk teqna û qoricîyî birîndar bîyî. Serebûtî ra dima cendirmeyanê qereqolê Kirkgeçîtî eşt keyeyê dewijan Feyzî Abut û Yuksel Abutî. Seba ke Feyzî û Yuksel keye de nêbîyî, bi bahenaya ke hayîya înan tira est a, venga Surrî Alici û Cumhur Aliciyî da. Bi bahaneya ke 'keyeyê înan de endamê rêxistine mendê û kutikî materyelê sey bomba tesbît kerdê' wird birayî zî erzîyayî zîndanî.

Surrî Alici û Cumhur Alici heta hezîrana 2018î zîndan de mendî û dima mehkeme ê vera dayî. Muhakemekerdişê Mehkemeya Cezaya Girane ya 4. ya Wanî de vejîya werte de zabitnameyê serê dewijan sexte yo. Leşkerê ke mesuldarê kutikî yo, dîyar kerd ke kutik hêrişker bi û eşkeno merdiman parçe bikero. Leşkeranê ke zabitname îmza kerdo zî pare kerd ke înan nêzanayêne ke zabitname çira ameyo amadekerdene û tedeyîya ci çita bîya.

Sînan Ozaraso ke avûkatê Surrî Alici û Cumhur Aliciyî yo, îfade kerd ke  dosyaya dewijanê ke sey şahîdanê nimiteyan ameyê mojnayene zî sexte ya, zabitnameyê îxbar û bomba zî sexte yo. Ozarasî vat: ''No zabitname saete 08.00 de yeno amadekerdene. Bi bahaneya ke kutik lawîyayo zabitname nusîyeno. Bi bananeya ke beno ke hayîya înan serebûtî ra est a, venga wird dewijan yeno dayene. Saete 10-11 de dewijî yenê berdene bi qereqolî la îxbare saete 08.00 de ameyo kerdene. Kesanê ke zabitname îmza kerdo, par ekerd ke înan dewijî seba agahîye berdêne bi qereqolî. Bi nê hawayî eşkera bi ke îxbarêko winasên zî çin o. Zabitname zî raştî ra dûr o û sexte yo. Ma vînenê ke dewlete vera hemwelatîyan dafike naya ro. Bi delîlanê vera huqûqî serrêke di kesî zîndan de yenê tepiştene. Muhakemekerdişî ra dima bira veradayîşî ameye dayene.''