2ê temmuza 1993yî de Otêlê Madimakî de bi paştdayîşê dewlete faşîstan 33 kesî qetil kerdî. Bi wesîleya serrgêra qirkerdişî xelêk bajaran ra bi hezanê kesê ke şîyî Sêwas şehîdî yad kerdî.

Saetanê serê sibayî şar verê Komeleya Kulturî ya Pîr Sûltan Abdalî de ame têhet. Pîya bi merdimanê şehîdan xeylêk partîyê sîyasîyî û dezgehê komelê sîvîlî tewrê aktîvîteyî bîyî. Ver bi Otêla Madimakî rayraşîyayîş ame kerdene.

Merdimanê şehîdan pa fotografanê şehîdan vernî de cayê xo girewt. Bi hezaran kesan nameyê şehîdan wendî û bi sloganan da ard ziwan ke înanê ke Sêwas vêşna AKP nayo ro.

Komela Pîr Sûltan Abdalî ra Gamze Aktaşa ke serê wesayîtî de qisey kerd vat: ''Semedê kurdan, elewîyan û ermenîyan edalet nîno caardene. Kiştoxê Sêwasê ke dezgehanê dewlete de xebityene bi serran nêameyî dîyene, ameyî xelatkerdene. Kiştoxê Sêwasî pîrikê xo Ahmet tehlîye kerd la tepişteyê nêweşî yê sîyasîyî nînê veradayene. Çunke şirikê kiştoxanê Madimakî îqtîdar de yê.''

Rayraşîyayîşî ra dima merdimanê şehîdan verê otêle de vilîkî nayî ro. Badê rêzgirewtişî semedê şehîdan semah ame kerdene. Dima ra Serekê Pêroyî yê Komeleya Kulturî ya Pîr Sûltan Abdalî Cuma Erçeyî qisey kerd. Erçeyî bi nameyê dezgehanê elewîyan vat: ''Na otêle hema  vêşana û roşn dana. Ma qeraranê mehkemeyanê dewleta nêsarisnenê. No sûcê vera merdimîye yo. Na dewa nêeşkena bêro qefilnayene.Heta caardişê edaletî têkoşînê ma do dewam bikero. Hema zî her roje qirkerdişî benê. Komelê ke tarîxê xo reyde nînê têrî tarîtîye ra nêvejîyenê. Ma zaf dejî antî la ma çirey bawerî û raştîyanê xo ra peyser game nêeşetê, ma do meerzê.''

Badê qiseykerdişî verê çimanê polîsan de faşîstan şaro ke tewrê yadkerdişî bîyo heqeretê ci kerd.