Hewteyê vîyarteyî de Meclîs de bi rayanê AKP-MHP, ÎYÎP û CHPyî seba ke leşkerê tirkî Lubnan de serrêkna bimanê destûrnameyê şerî amebi qebulkerdene. Wina pawîyeno ke destûrnameyê şerê Iraq-Sûrîye zî hewteyê verê ma de do bêro Meclîsî. 

Wekîlê Partîya Têdûştîye û Demokrasîyî ya Şaran (HEDEP) Alî Bozanî û Wekîlê Partîya Kede (EMEP) Îskender Bayhanî derheqê babete de ANFyî rê qisey kerd.

Alî Bozanî vist vîrî ke destûrnameyê şerê Iraq-Sûrîye 2021 de seba 2 serran amebi qebulkerdene û vat: ''Nika yeno waştene ke destûrnameyê şerê Iraq-Sûrîye dinê serran bêro dergkerdene. Eke destûrname bêro qebulkerdene do si serran erk bido Serekkomarî. No destûrname mojneno ke îqtîdar şer de israr keno. Raporê rêxistinanê mîyanneteweyîyan îsbat kenê ke operasyonanê Tirkîya ya teberê sînorî de bi seyan sivîlî ameyê qetilkerdene. No destûrname do erk bido Tirkîya de erdê Sûrîye de ancî operasyonan bikera. Ma zanenê ke seba ke destkewteyê Rojawanî bêrê çinkerdene no destûrname yeno amadekerdene. 

No destûrname bi bahaneya 'asayîşî' yeno amadekerdene la rayîrê caardişê asayîşî şer ney haştîye yo. Tirkîya ganî gamanê demokratîkan û haştîyaneyan bierza; seba ney zî ganî tecrîdê vera Birêz Oalanî wedarna. Selahîyetdarê dewleta tirke zî zanenê ke bii wedaritişê tecrîdî rayîrê haştîye do abibo. Ganî cade Birêz Ocalanî de pêvînayîş bêro kerdene.''

Wekîlê EMEPî yê Îstanbulî Îskender Bayhanî vat: ''Îqtîdarê AKP-MHPyî wazeno ke destûrnameyê şerê Sûrîye-Iraqî dinê serran dewam bikero û mojneno ke îqtîdar meseleya kurdan de bi zorbazîye polîtîkayanê şaşan rê dewam keno. Îqtîdar hema zî xeyalê dewleta Osmanîyan keno û krîzanê welatî giranêr keno. Şer xizanîye û rijîyayîşî ra ber xizmetê çîyê bînî nêkeno. Erdogan bi rayîrê nê destûrnameyî do hem şarî xizan bikero hem zî bi polîtîkayanê şerî şarî bixapîno û mehkumê kolonyalîzmî bikero. Wa şar bi ney mexapîyo. Ma nê destûrnameyî rê vajê ney. Ma venga pêro kedkaran û karkeran danê ke vera polîtîkayanê şerî têkoşîn bikerê.''