Hîrê mektabanê Bielefeld de dersa ziwanê dayîke ya kurdkî yena dayene. Qeydî do heta 29ê adare dewam bikerê. Mektebêkê Herfordî de zî perwerdeyê ziwanê dayîke esto. Tîya zî qeydî do heta 30 nîsanê dewam bikerê.
Înîsîyatîfê Keyeyanê Kurdan bajaranê Herford û Bielefeldî yê Almanya de seba ke mekteban de dersê ziwanê dayîke yê kurdkî bêrê dayene kampanya rayra benê.
Înîsîyatîfê Keyeyanê Kurdan bajaran Herford û Bielefeldî de 20 sibate de pîya bi dostanê xo yê almanan kombîyayîşo online kerd semedê ziwanê dayîke kampanya daye destpêkerdene. Endamê înîsîyatîfî ke bi şîarê ''Ma semedê ziwanê dayîke yê xo bibê seferber'' daya destpêkerdene paştdayîşê keyeyanê kurdan pawenê.
Hîrê mektabanê Bielefeld de û mektebêkê Herfordî de perwerdeyê ziwanê dayîke yê kurdkî yeno dayene. Bielefeld de qeydî do heta 29ê adare û Herford de zî qeydî do heta 30ê nîsane do dewam bikerê.
Endamanê înîsîyatîfî ra Devran Karacayî ard ziwan ke qanûnî îmkanê perwerdeyê ziwanê dayîke danê û veng da ke keyeyanê kurdan de wa mekteban de qeydê domananê xo bikerê. Karacayî ard ziwan ke ê formê muracatî zî înternetî ser o keyeyan rê şawenê.
Nazim Acaro ke Meclîsê Xerîban ê Şaredarîya Herfordî de ca geno bale ante muhîmîya wayîrvejîyayîşê nasname û kulturê kurdan ser û veng da ke wa keyeyî semedê ziwanê dayîke muracat bikerê.
Vervatoxa Înîsîyatîfê Keyeyanê Kurdan Bielefeldî Zarîfe Huseyîn zî ard ziwan ke eke muracatî bibê zaf ê eşkenê dersê ziwanê kurdkî mektebanê bînan ra zî vila benê û semedê nayî ganî kurdî muracatê kurdkî bikerê.
