Bîlançoya vîrûsê Korona giran bena

Hûmara merdimanê ke vîrusê Korona ra merdî bena zêdêr. Welatê herême zî sînoranê xo gênê. Çîn de mabênê 24 saetanê peyênan de 150 kesî merdî.

Îran de hûmara merdimanê ke vîrusê Korona ra merdî bîye zêdêr. Ewro zî 4 kesî vîrusî ra merdî. Bi nê hawayî hûmara qurbanîyan bîye 12 kesî. Ame parekerdene ke temamîya Îranî de 47 kesî bi vîrusî kewtî.

Dima ke vîrus Îran de ver şi û welatê ciranê Îranî zî têgêrayî. Iraq seba ke vîrus derbazê ci nêbo 20ê sibate de seba 3 rojan berê xo yê sînorî padayî.

Walîyê Dîyala Musenna Et Temîmîyî zî bi eşkerayîyêke pare kerd ke berê sînorî yê Mendelî-Somer û Mundurîye qasê 3 rojan seba bazirganîye padîyayî.

Bi seyan kesî binê karantîna de yê

Êyê ke Îranî ra agêrenê Iraq de û Başûrê Kurdîstanî de dekewenê karantîna.

Wezîrê Karanê Teberî yê Herême Rêber Ahmedî çend rojan verê cû eşkerayîyêke daye û îfade kerd ke iraqijê ke Îranî ra agêrayî do 14 rojan binê çimdarîya tibbîye de bimanê.

Wezîrê Weşîye yê Hukmatê Herême Saman Berzencîyî zî ard ziwan ke 911 kesê ke verê cû Îranî ra agêrayî binê karantîna de yê.

Berpirsîyarê Çapemenîye yê Berê Sînorî yê Başmakî yê Silêmanî Haci Alîyî da zanayene ke çarçewa fermananê Wezaretê Karanê Teberî û Wezaretê Weşîye yê Herêma Kurdîstanî de kesê ke Îranî ra agêrayî binê kontrolê tîmî de yenê derbazkerdene.

Rewşa Koreya Vakure û Çînî

Çîn de zî ke tede vîrus vejîya meydan mabênê 24 saetanê peyênan de 150 kesî merdî 409 kesî zî bi vîrusî kewtî. Hûmara merdimanê ke Çîn de vîrusî ra merdî resaye 2 hezar û 594 kesî. 77 hezar û 150 kesî zî bi vîrusî kewtî.

Koreya Vakur çarçewa tebdîranê vera vîrusî de 380 xerîbî welat de vistî binê karantîna.

Ame parekerdene ke temamîya înan dîplomat ê ke Pyongyang de wezîfedar ê.

Nêzdîyê 200 xerîbî 30 roj ê ke nêeşkenê cayo ke tede yê ra bivejîyê û wextê karantîna zî ame dergkerdene.

Koreya Vakure de hema kesêk de vîrus nêame tesbîtkerdene.