Nê rojan de xebatê seva weçînitişê cayîyî ameyê destpêkerdene, îqtîdarê AKPyî çi bi vatiş çi zî bi îcraatanê xo hêrişê HDPyî keno.

Erdogan qiseykerdişanê xo de vano ke eke HDP şaredarîyan qezenc bikero o do qeyûman tayînê ê şaredarîyan bikero. Dimayê nê vatişanê ê ra sere de Amed xeylî şaristanan de operasyonê qirkerdişê sîyasî dest pêkerdîbî.

Bîlgenî vat wina aseno ke îqtîdar bicaardişanê xo yê antî-demokratîkan ê ke heme weçînitişan de bica ano do nê weçînitişê cayîyî de zî tetbîq bikero û na babete ser o ANFyî rê fikrê xo vatî.   

'ZANO KE DO ŞERTANÊ NORMALAN DE VINDÎ BIKERO'

Bîlgenî vat eke îqtîdar şertanê normalan de şiro weçînitiş do vindî bikero û wina dewam kerd : “Krîzo îqtîsadî ke berhemêkê îqtîdarî yo û xetayê ke polîtîkayanê zere û teberê welatî de yenê kerdene mendişê îqtîdarî fînenê halêkê zorî mîyan. Na yewe ra îqtîdar îhtîyac vîneno ke reyna kampî mabênê şarî de virazîyê, bi polîtîkayanê xo yê dişmenî û cîyakaran wazeno şarî pêkewo. Seva naye zî keno ke HDPyî sey partîyêka qanûnî nê, labelê sey partîyêk nêqanûnîye ramojno.“  

'EKE TESLÎM BIBÊ ALTERNATÎF DO NÊEŞKO BÊRO AWANKERDENE'

Bîlgenî ard ziwan ke hemverê heme bicaardişanê îqtîdarî de netîceyê weçînitişî do hetê şaran ra bêro tayînkerdene û ganî muxalefet hayî  ro mesuldarîyanê xo bibo.

Dewamê qiseykerdişî de Bîlgenî vat: „Weçînitişanê cayîyan de netîce do tenya hetê plan û mûndeyanê îqtîdarî ra nêro tayînkerdene. Çîyo tesîrdar o yo ke tirêm do muxalefet bieşko bibo wayîrê stratejîyanê xurtan. Eke hemverê tersî de çok rono û teslîmê sîstemî bibo do îmkanê awankerdişê alternatîfî zî memano.“

'WEÇÎNITIŞAN DE YEWÎ Û QERARDARÎYE LAZIM A'

Bîlgenî peynî de ard ziwan ke AKPyî xebatê weçînitişê  cayîyî rew ra dayê destpêkerdene û wazeno ke nê xebatanê xo bi temamî bi polîtîkayanê xirabramotişî yê HDPyî ser o dewam bikero. Bîlgenî vat ganî kurdî pîya tê bigêrê, qerardarîya ke eşkenê xo bi xo raye ra berê ramojnê.