Avûkatanê Rayberê Şarê Kurdî Abdullah Ocalanî ra Îbrahîm Bîlmezî derheqê tecrîdê Îmraliyî de ANFyî rê qisey kerd.

Îbrahîm Bîlmezî pare kerd ke Komployo Mîyanneteweyî Îmrali de bi tecrîdî dewam keno. Bîlmezî îfade kerd ke sîstemê komployî seba ney bi û vat: ''Birêz Abdullah Ocalan bi tewirê xo yê haştîyanetî bê tawizî çareserîya demokratîke de israr kerd û no sîstem pûç kerd. Oyo nikayên tecrîdî ra zî wetêr o. 2.5 serrî yo ma nêeşkenê qetî Abdullah Ocalanî ra xeberêke bigêrê. Dinya de nimûneyêka na rewşe ya bîne çin a. Qet yew welatî de zîndanêk çin o ke avûkat û keye nêeşkenê şorê zîndanî. Rixmê ney zî dinya verê nê tecrîdî de bêveng a.

Abdullah Ocalan seba xîretanê xo yê haştîye yeno cezakerdene. Mi bi xo dî ke o mîyanê ê şertanê Îmraliyî de zî bi îradeyêkê pîlî xo ver dano. Hêzê komplogerî hema zî xîret kenê ke verê Birêz Ocalanî bigêrê. Prosesê koployî bi tecrîdî dewam keno. Dewleta tirke seba ke çareserîya meseleya kurdan nêwazena û şerî wazena tecrîdî rê dewam kena. La seke Birêz Ocalanî vatbi meseleya kurdan tewr zaf zerar dana şaranê Tirkîya.''

Bîlmezî dîyar kerd ke Tirkîya mehkumê meseleya kurdan û tecrîdî yena kerdene û vat: ''Tecrîd yeno manaya çaresernêkerdişê meseleya kurdan. Tirkîya tecrîdî ra mîyanê krîzan de yê. Tecrîdê Îmraliyî her kesî eleqedar keno. Bêhuqûqîya Îmraliyî temamîya Tirkîya rê vila bîya. Çunke huqûq de çîyê bi nameyê 'rewşa îstîsnayîye' çin o. Qanûnê ke vera Abdullah Ocalanî amade bîyê ewro Tirkîya de bîyî meseleyêke. Seke Birêz Oalanî vatbi meseleya kurdan ganî bi rayîrê haştîyaneyî bêra çareserkerdene ke wa Tirkîya qezenç bikera. Ganî dewlete peynîya bêhuqûqîya Îmraliyî bîyara. Ez venga her kesî dana ke na babete de hîsger bibo.''