Borlange û Duisburg de şehîdî ameyî vîrardene

Bajarê Borlange ya Swedî û bajarê Duisburgî yê Almaya de şehîdê aşma Têşrîna verêne ameyî vîrardene.

Borlange de rayberîya Merkezê Demokratîkî yê Kurdan de bi aktîvîteyêk şehîdê aşma Têşrîna verêne ameyî vîrardene.

Vîrardiş de nameyê keyeyanê şehîdan ra Şefîk Agirî qisey kerd. Agirî ard ziwan ke xerê fedakarîya şehîdan ra çar leteyê Kurdîstanî de şarê kurdî qezencê girdî vistî destî û kurdê ke Ewropa de yê înan ra waşt ke wa xeta şehîdanê xo de mucadaleyî gird bikerî.

Bajarê Duisburgî yê Almaya de zî bi heman waştişî aktîvîteyêk ameye viraştene.

Vîrardişo ke hetê Meclîsê Cinîyan yê Şehîd Asya Yuksele û Merkezê Komela Demokratîke yê Kurdan (DKTM) ra ame organîzekerdene, merdimê şehîdan û xeylî kesî tewrê ci bîyî. Şexsê Berfîn Ehmede, Şerwan Çewlîg, Nîzar Hassan û Umît Acarî de şehîdê aşma Teşrîna verêne ameyî yadkerdene.

Vîrardiş de nameyê Komîteya Keyeyanê Şehîdan  (KOMAW) ra Mehmet Suruçî muhîmîya rolê şehîdan ser o qisey kerd. Bado zî nameyê Têgêrayîşê Cinîyan ê Kurdan ra qiseykerdişêk ame kerdene û mesajo ke pîyê Umît Acarî  erşawitibi, ame wendene.

Vîrardiş bi slogananê  ‘‘Şehîdî nêmirenî“, ‘‘Bicuyo  Rayber Apo‘‘ û “Cinî, Cuye, Azadî‘‘ qedîya.