Parlamenterê Partîya Demokrasîyî û Têdûştîye yê Şaran (DEM Partî)  Alî Bozanî derheqê xîleyanê qeydkerdişê weçînitoxan ê îqtîdarê AKPyî de ANFyî rê qisey kerd.

Bozanî vist vîrî ke îqtîdarê AKPyî 8 serrî yo îradeyê kurdan bi qeyûman xesp kerdo û nê vatî: ''Kurdîstan de  herinda şaredarîyanê ke bi îradeyê şarî ameyî weçînayene de qeyûmî ameyî cakerdene. Nika semedê weçînayîşê 30ê adare metodêko bînî visto dewre. Îqtîdar cayê ke HDPyî weçînayîşanê 2019 de bi ferqênê qijan girewtî, tîya de weçînitoxanê xo ca keno.

Kurdîstan de bitaybetî leşker û polîsî sey weçînitoxan yenê qeydkerdene. Ma vînenê ke ge ge yew adres de 500 ya zî hezar kesî ameyî qeydkerdene. Esendereyê Colemêrgî de hûmara weçînitoxan 3 hezar û 500 ya la tîya hezar û 700 leşker û polîsî ameyî qeydkerdene . Akdenîzê Mersinî de zî keyeyê Şaredarê AKPyî Mustafa Gultakî de 5 kesî est ê la senî ke keye de 28 kesî ronişenî qeydê weçînitoxan ame kerdene. Têna şaredarî wina nêkerdo reyna hetkarê ci û AKPyijanê bînan zî wina kerdo.

Seba ke îradeyê kurdan xesp bikerê heme metodan şuxulnenê. Nika hema hema  pêroyê bajaranê Kurdîstnî de qeydê weçînitoxan ê xîleyin est ê. Qezayanê Amedî de, Colemêrg, Şirnex, Bedlîs, Agirî, Qers, Mûş û Idirî de est ê. Ça de ma nê xîleyî ferq kedî ma tîya de muracatî kerdî la îtîrazê ma ameyî redkerdene. Nika do merkezê pêroyî yê partîya ma îtîraz bikero. Heyetê Weçînayîşê Berzî xora bi talîmatê Erdoganî têgêreno. AKP vizêr bi qeyûman waştêne îradeyê kurdan xesp bikero, ewro zî bi xîleyê weçînitoxan. Ma do destûr medê nê. Îqtîdar se keno wa bikero ma do şaredarîyanê xo reyna bifînê dest. Rixmê heme xîleyanê îqtîarî ma do şaredarîyanê xo peyser bîgêrê.''