Hemserekê pêroyî yê KESKî Mehmet Bozgeyîkî Bazarcixê Mereşî de derheqê halê ucayî de qisey kerd û vat, ‘‘Hema zî binê xirban de însanî est ê û qet mudahaleyêk zî nêameya kerdene. 80 saetî vîyartî nas û merdimê înan paweyê mucîzeyêk ê. Reyna Hatay, Meletî û Semsûrî de zî ma eşkenê vajê ke dewlete nêeşkena mudaheleyê şarê xo bikera û nêverdana ke şar û rêxistinê sîvîlî zî hetkarî bikerê.

Bozgeyîkî  wina dewam kerd: ‘‘Nika ra pey gere ma hem hetê weşîye ra hem zî hetê werd, hîjyen û setarbîyayîşî ra tedbîranê zaf başan bigîrê. Û ma vînenê ke Kizilay zî nê cayan ra nêasena. Yanî ez seba Bazarcix, Îslahîye, Narli û Nûrdagi vana ke, mi yew çadira Kizilay zî nê cayan ra nêdîye. Tena şaredarîyî, cemxaneyî û sendîkayî tîya de est ê.

Mîyanê şarî de cîyayîye yena viraştene

Bi kilmkî, felkatêka girde est a. Wa sereyê şarê ma weş bo. Bi taybetî ma vînenê ke dewlete wexto ke çadir û hetkarîyan vila kena zî şarê xo sey yewbînî nêvînena. Bi taybetî Narli de ma şarê xo ra musayî ke zafê dewe serûbin bîya la çadir û hetkarîyî bînî wexto ke yenê vilakerdene mabênê şarî de cîyayîye danê viraştene. Dewê ke elewî û kurd ê, înan rê hetê dewlete ra hetkarî nêerşawîyena yan zî zaf kêmî erşawîyena.

Herinda Halê Îstîsna  de eşkîyayêne herêma afetî îlan bikerê

Seke şima zî zanê Halo Îstîsna  ame îlan kerdene. Û dewlete ney zî bi nîyêtêko xirab xebitnena. Medyaya sosyale qedexe kerde û sînorî dayî roneyene. Serê çapemenîye de tehdayî est ê. Gere dewlete lez fek nê çîyan ra verda û Ohalî hewana. Herinda Ohalî de gere herêma afetî bêra îlankerdene.’’