Bruksel de verê Parlamentoyê Ewropa de hêrişê  grûbanê faşîstan ê AKP-MHPyî yê vera kurdan ke Newroze ra agêrayêne, ame protestokerdene.

Herêma Limbourgî ya Belçîka de vizêr bajarêkê Heusden-Zolderî de kurdê ke zafê înan rojawanijî bî, Newroze ra agêrayêne raştê bi seyan nîjadperestan ê AKP-MHPyî ameyî.  Bi desan kesê ke hêrişî ra remayî kewtî keyeyêk tehdîdê vêşnayîşî ciwîyayî.  Hêriş de yewê înan bi giranî xeylêk kesî birîndar bîyî.

Waranê cîya cîyayan ê Ewropa ra bi seyan kurdîstanijî û dostê înan verê Parlamentoya Ewropa ya Brukselî de ameyî têhet. Mîtîngo ke Meydanê Luxsembourgî de ame kerdene posterê Rayberê Şarê Kurdî Abdullah Ocalan û alayê PKK, PJAK û Kjarî ameyî kiriştene û sloganê qesas û xoverdayîşî ameyî vatene. Reyna posterê girdî yê Ocalanî alaya girde ya PKKyî bale ante xo ser.

Eşkerayîya ke hetê Konseya Demokratîke ya Komelê Kurdîstanî ya Belçîka (NAV-BEL) ra ameye hazirkerdene, ameye wendene. Eşkerayîye de nê ameyî vatene: ''Nê hêrişî polîtîkaya deweta tirke ya dişmenîya kurdan ra xoser nîyê. Bi qîrayîşê tekbîran kurdan rê hêriş ame kerdene ke Newroze ra agêrayêne. Kurdê ke keyeyêk de mehsûr mendî ame waştene ke bêrê vêşnayene. 7 kurdî birîndar bîyî û yewî ra xebere nîna girewtene. No hêriş ne verên ne zî peyên o. Ganî meqamê Belçîka semedê asasyîşê kurdan tedbîran bigerê û şêri Tirkîya ser ke wa goreyê huqûqî têbigêro.''

Hemsereka KCDK-E Zubeyde Zumrut zî vat bi nê hêrişî yeno waşteno ke Hemleya Azadîye wa versîya faşîzmî de bimano.

Tesmîlkara PYD Ewropa Mizgîne Ehmed zî vat: ''No hêriş û hêrişo ke 19ê adare de Rojawan de ame kerdene nê wird hêrişî  têna vera yew keyeyî nê, vera dewaya kurdan ê. Dewaya kurdan çend girde bena, yewîya neteweyîye hêzdar bena, şarê ma hêzdar beno dişmen beno har û hêrişê şarê ma keno.''

Çalakîya protestoyî de polîsan bi gazanê hesran hêrişê çalakwanan kerd û bi TOMA û polîsan dormeyê çalakwanan ame girewtene. Organîzatoran veng da şarî ke wa cewabê hêrişê polîsan medê ke wa pêkewtiş mevejîyo.''