Komîsyonê Plan û Budçe yê Tirkîya de derheqê budçeya 2024î de pêvînayîşî dewam kenê. Wekîlê HEDEPî yê Mûşî Sezaî Temellîyo ke tewrê pêvînayîşan beno derheqê babete de ANFyî rê qisey kerd.

Temellîyî pare kerd ke AKP budçe seba pawitişê xeta xo ya sîyasîye, mendekerdişê îqtîdarê xo amade keno û vat: ''Seba AKP rayîrê mendebîyayîşî şer û pêkewtiş ê. Xora welat de bêhuqûqî, polîtîkayê şer û krîzan bîyî karê serekeyî.Tirkîya ewro karanê bêusûlan rê bîya nimûne.''

Sezaî Temellîyî vist vîrî ke sey budçeyanê bînan budçeya 2024î de zî bara girane do bikewa milê kedkar, karker û şaran ser û vat: ''Nîsbetê bacan ancî do bibo se ra 66. Ma hol zanenê ke bacî bi hawayêkê têdûştî nênê arêdayene û tesîrê şarî kenê. Mîsal budçeya dezgehan şarî ra sey bacî arê dîyena. Budçe seba ke xizmetê îqtîdarî bikera yena amadekerdene. Na budçe do hîna zaf zeman xo de bîyara. Coka ma vanê budçeya 2024î budçeya şerî, bêusûlî û rantî ya. Bara na budçe do bikewa milê cinîyan, domanan, kedkaran, ciwanan, şarê kurdî û medûran ser.''