Wezîrîya Kultur û Sporî û Wezîrîya Karanê Zereyî yê Tirkîya çarçewa 'aktîvîteyêke' de wazenê 300 pîranê elewîyan bişawê Kerbela û seba ciwananê elewîyan zî Nevşehîr de 'Kampa Ciwanan a Haci Bektaşî' bikerê. Kampe do bi beşdarîya 400 ciwanan 17-23ê tebaxe de bêra kerdene.

Wekîlê HDPyî yê Antalya Kemal Bulbulî derheqê babete de Meclîs de qisey kerd. Bulbulî pare kerd ke Wezîrîya Karanê Zereyî qeymeqam û walîyan rê nuşteyêk şawit û 'pîrê elewîyî' waştî. Bulbulî vat: ''Şima vanê cemxane çin o, nika pîranê cemxaneyî wazenê. Şima sextekarîye kenê. Qirkerdişê Garê Anqara, Madimak, Pirsûsî; Tirkîya bi xo bîya  Kerbela. Hînî elewîtîye mekerê hemkara kayanê xo. Bernameyê aktîvîteya şima de vajîyeno 'şovê semahî', semah şov nîyo yew îbadet o. Şima ganî verî hûrmetê bawerîya ma bikerê.

Tirkîya de elewîyan rê hemwelatîya têdûşte nêdîyena, Tirkîya de xizanîye, meseleya kurdan, şîdetê vera cinîyan, faşîzmî est ê. Heta ke elewîyî nêrê şinasnayene, meseleya elewîyan nêra çareserkerdene na komare temam nêbena. Ma do nê înkar û tekperestîye wedarnê.''