Çarçewa newe ra awankerdişî de kombîyayîşê şarî yê Partîya Çep a Keske dewam kenê. Hatay, Mereş, Semsûr, Dîlok û Meletî yê ke erdlerzê 6ê sibate de bi giranî terîb bîyê û wayîrê nufusê elewîyan ê, nînan de Wekîlê HDPyî yo verên Kemal Bulbul tewrê kombîyayîşanê şarî beno. Bulbulî derheqê kombîyayîşanê şarî, babeta newe ra awankerdişî û hêvîyanê elewîyan de ANFyî rê qisey kerd.

Bulbulî ard ziwan ke ê tradîsyonê kombîyayîşanê şarî rê dewam kenê û xîret kenê ke şirove, rexne û pêşnîyazanê şarî bîyarê ca. Bulbulî vat: ''Ma şarê xo ra wazenê ke têkilîyanê îdareyanê ma yê qezayan ra heta îdareyê pêroyîyî ercnayîşanê xo bikerê. Ma ercnayîşanê bitesîran gênê. Bi taybetî rexneyê serê têkilîyanê herêmîyan ê partîye zaf bîyî. Ma do prosesê verê ma de nê kêmasîyan safî bikerê.

Xora sey tedayanê dewlete dînamîkê teberî zî est ê la seba ma dînamîkê zereyî girîng ê. Rexneyê şarî yê serê newe ra awankerdişî zaf bitesîr ê. Ma do nê rexneyan ser o newe ra Partîya Çep a Keske awan bikerê.''

Bulbulî bale ante waştişanê elewîyan ser o û vat: ''Elewîyî rexne kenê ke teyna pê wekîlanê elewîyan nêbeno û ganî ê hîna bi xurtî bêrê temsîlkerdene.''

Bulbulî ard ziwan ke kombîyayîşanê şarî de teyna proses û partîye nênê rexnekerdene û şar seba prosesê newe ra awankerdişî bi kelecan o. Bulbulî vat: ''Ma do bi kede û fedakarî prosesê newe ra awankerdişî ser bivisnê, rayîrêko bîn çin o.''