Di baskan ra Rayraşîyayîşê Azadîye yo Pîl seba azadîya Rayberê Şarê Kurdî Abdullah Ocalanî û çareserîya meseleya kurdan dewam keno.

Beşdaranê rayraşîyayîşî ra Endamê Meclîsê Partîye yê DEM Partî Kemal Bulbulî ANFyî rê qisey kerd û da zanayene ke heta ke Rayberê Şarê Kurdî azad bibo rayraşîyayîşê înan dewam bikero.

Bulbulî îfade kerd ke tecrîd înkarkerdişê kurdan o û vat: ''Îmrali de waştişê haştîye û çareserîye yê şarê kurdî yenê tecrîdkerdene. Tecrîd vera merdimatîye sûcêk o. Tecrîd vera heqanê merdiman ê umûmîye û demokratîkan hêrişêk o û nêno qebulkerdene.''

Bulbulî bale ante paradîgma û perspektîfê çareserîye yê Rayberê Şarê Kurdî Abdullah Ocalanî ser û vat: ''Birêz Ocalan prosesê haştîye de bi projeyê xo yê demokrasîyî mojna ke o eşkeno pêro meseleyanê Tirkîya û Rojhelatê Mîyanênî çareser bikero. Coka o yeno tecrîdkerdene. Ma tecrîdî sey hêrişê vera heqanê xo ercnenê.''

Bulbulî dîyar kerd ke ê bi tewir û enerjîya azadîye xo biresnê 15ê Sibate û rayraşîyayîşê înan qedî bi azadîye biqedo.