Yalova de berê 5 keyeyan ê elewîyan amebî nîşankerdene û serê beran de 'elewî' amebi nuştene. Serdozgerîya Komare ya Yalova da zanayene ke înan derheqê mesele de tehqîqatêk da destpêkerdene.

Wekîlê HDPyî yê Antalya Kemal Bulbulî  mesele berde Meclîsî. 

Bulbulî Meclîs de qisey kerd û vat: ''Heta nika sûcdarêk nêame destbendkerdene. Wa Wezaretê Karanê Zereyî, Walîtîya Yalova, Serdozgerîya Komare, Mudirê Asayîşî ya nê sûcdaran bivînê yan zî wa îstîfa bikerê. No kerdiş rezalet o, skandal o. Berêkê ma nêmendo ke nêameyo nîşankerdene. Na senî yew hîşmendîya asayîş û huqûqî ya? No kerdiş vera elewîyan zulm û gef o. Ma do nê serebûtî teqîb bikerê.''

Bulbulî peynîya qiseykerdişê xo de venga selahîyetdaran da û vat: ''Ya şima nê hêrişkeran vînenê yan zî ma do bivînê.''

Hetê bînî ra badê zafbîyayîşê nêrazîbîyayîşan derheqê Serdozgerîya Komare ya Yalova da zanayene ke înan cipêrsayîş dayo destpêkerdene.