HDPyî çarçewa Kampanyaya 'Semedê Her Kesî Edalet' de Anqara de otêle ke de ğê şîarê 'Heq, Edalet û Wijdan' alîmanê dînî reyde kom bi. Omer Farul Gergerlîoglu zî tewrê kombîyayîşî bi. Salona kombîyayîşî de dowîzê bi nuşteyê 'Ma seba edalet, heq û wijdanî yenê pêser' ameyî daliqnayene.

Verî Berpirsîyara Komîsyonê Bawerî û Şaran ê HDPyî Tulaye Hatîmogullari qisey kerd û pare kerd ke hînî na cografya de edalet û heq nêmendê. Tulaye vat: ''Hz. Muhammed vano 'êyê ke vera zulmî xo ver nêdanê umetê mi ra nîyê' Ma seba ke fikr û ewnîyayîşanê şima bigêrê nê kombîyayîşî kenê. Ma seba meseleya kurdan, elewîyan, cinîyan, ciwanan, erd û hasmênî edalet wazenê. Ma seba partîya xo ke ê wazenê biqefilnê edalet wazenê. Ma seba Selahattîn Demîrtaş, Fîgene Yuksekdag, Leyla Guven edalet wazenê. Wekîlê ma Omer Faruk Gergerlîoglu wexto ke destmaj girewtêne polîsan o destbend kerd. Ê kesê ke tim qala dîn û îmanî kenê la xirabîye ra ber çîyêk nêkenê vera nînan qetî edalet do bêro caardene.''

Hemsereka Pêroyî ya HDPyî Pervîne Buldan zî wina qisey kerd: ''Bi mîlyonan kesan Newroze de mesajê haştîye û demokrasî da û vat ke ê do vera zulmî milê xo çewt nêkerê. Edalet çime û kokê Îslamî yo. Ewro ziwan, nasname, kultur, azadîya bawerîya ma binê ablûqa de yê. Nê welatî de kurdan, cinîyan, şaran û karkeran rê her kesî rê neheqîye yena kerdene. Bingeyê meseleya kurdan de bêedaletî, înkar, cîyakerî, neheqî estê.

Ewro Tirkîya de Îslam binê hukmê îqtîdarî de yo. Înan embazê ma Gergerlîogluyî rê neheqîyêka pîle kerde. Ma hetê ey de yê û ma do vera nê zulmî milê xo nêarê war. HPD fikrê Îslamî temsîl keno. Ma do vera pêro zulm û zulmatî, bêedaletî têkoşînê xo rê dewam bikerê.''

Kombîyayîş de alîm Ubeydullah Zanyarî zî da zanayene ke bingeyê Îslamî de edalet esto la ewro Îslam ame texrîbkerdene. Zanyarî vat: ''Welatê ma de binê nameyê dînî de xeylêk qirkerdişî yenê kerdene. Ganî ma şarê xo şerê nînan ra bipawê. Ez hêvî kena ke sîstemê materşahîye beno serdest û edalet ano ca.  Cinîyî biwijdan û edîl ê.''

Aktîvîste Nurtene Ertugrul pare kerd ke Omer Faruk Gergerlîoglu pê kerdişanê xo pêro welatî rê bi mîsal û beno ke HDP bêro qefilnayene la îqtîdar nêeşkeno mezgê merdiman biqefilna.