Hemsereka HDPyî Pervîne Buldan kombîyayîşê Grûba Cinîyan ê Parlamentoya HDPyî de qisey kerd.  Wekîlê HDPyî bi wesîleya Roja Kincan ê Neteweyîyan ê Kurdan bi kincanê neteweyîyan tewrê kombîyayîşî bîyî. Mayê Haştîye, endamê HDPyî yê şaristananê cîyayan, temsîlkarê sendîkayan û dezgehanê sivîlan zî tewrê kombîyayîşî bîyî. Kombîyayîş de fotografê sîyasetmedaran ê tepişteyan ameyî berzkerdene û sloganê ''Cinîye, Cuye, Azadîye'' ame vatene.

Tepiştişê rojnamegeran

Buldane sere de bale ante tepişnayîşê Mudiro Pêroyî yê rojnameyê Yeni Yaşamî Mehmet Ferhat Çelîk û Mudirê Karanê Nuşteyan Aydin Keserî ser û vat: ''Vera rojnamegeran têgêrayîşê bêhuqûqî dewam kenê. Ma nê tewirê hukmê AKPyî şermezar kenê. Ê do nêeşkê vengê raştîye kêm bikerê.''

Cezaya Mizrakliyî

Buldane qiseykerdişê xo rê wina dewam kerd: ''Kesê ke dizdîye kenê teber de bi hawayêkê azadî gêrenê la hemşaredar Selçuk Mizrakli tepişte yo. Hîşmendîya ke ceza daye Selçuk Mizrakli wa bizana ke no devran do bivurîyo. Na hîşmendîye do hesabê kerdişanê xo bida. 

8ê Adare û hêrişê vera cinîyan

Seserra 21. seserra têkoşîn û serkewtişê cinîyan a. Cinîyî Tirkîya de û her ca de benê hedefê hêrişan. Her cayê dinya de destkewteyê cinîyan binê tehlukeyî de yê. Cinîyî her ca de vera faşîzmî xo ver danê. Îqtîdarê AKPyî 18 serran ra nata seba ke heq û deskewteyê cinîyan çin bikero polîtîkaya xo ya şerî ya vera cinîyan bihêz keno.  Ma mîsalê ney zî Taksîm de dî. Cinîyan rîxmê her astengî Rayraşîyayîşê Şewe yo Femînîst ard ca. Rayraşîyayîşî ra dima polîsan bi gazî, bombayan, guleyanê plastîkan hêrişê cinîyan kerd, cinîyî destbend kerdî. 8ê Adare de roja cinîyan de nê çîyî kerdî.

Gulîstane Doku

Gulîstane Doku 2 mengan ra nata vînbîyaye ya. Îqtîdarî seba ke Gulîstane nêra dîyene zaf xîret keno. Vernîyazê wekîlê ma yê seba Gulîstane de nameyê gumandarî ame pakkerdene. Reyna Dêrsim de hêzê leşkerîyî  wendekaranê cinîyan tacîz kenê, înan taqîb kenê. Nê serebûtî Dêrsim de şero taybet ê îqtîdarî eşkera kenê. Sey her cayê cuye de warê hukmkerdişî de zî hîşmendîya ke camêrdan pawena serdest a. Eke camêrdê ke vera cinîyan şîdet kenê leşker, polîs, personelê umûmîye yan zî terefgîrê îqtîdarî bibê serebût yeno mîyankerdene.Bedelê şerî tim cinîyan û domanan da. Tebaxa 2014î de Şengal de tewr tay 5 hezar cinîyê êzidîyî bîyî esîrê DAÎŞî, bazaran de ameyî rotene. Hema zî bi hezaran cinîyê êzidîyî vînbîyaye yê. Efrîn de zî heman rewşe xo mojna ra.

Îdlîb

Ma verî ra nata vat ke 'Şerî rê ney.Ganî şar hînî bedel nêdo.' Ma tezkereyan rê vat ney. La AKPyî goş pey HDPyî nêkerd. Hesabê înan o xelat Îdlîbî de eşkera bi.Ganî şima cade Sûrîye ra bivejîyê. Ganî hînî şima dişmenîya kurdan û polîtîkaya bêstatuverdişê kurdan ca verde. Oyo rast no yo ke ganî Sûrîye biba ê sûrîyeyîjan.

Multecîyî 

Ez tîya ra venga îqtîdarî dana; multecîyan sey hacetê bazarîyî mexebitnê, bi gefan û zorî înan meerşawê. Ez venga Ewropa dana; berê xo seba merdimîye abikerê. Multecîyan rê hetkarîye bikerê. Dinya keyeyê ma yo hempar a. Yew girîngîya sînoran çin a. Heqê hemwelatîyan esto ke her cayê dinya de biciwîyê.

'Semedê xizanîye şer o'

Ganî ma vera şerî tewirê xo bihêzêr bikerê. Semedê xizanîye şer o. Semedê bêkarîye şer o. Semedê şîdetî şer o. Semedê pûçbîyayîşî şer o. Ganî komel vera şerî wurzo payan ser, îqtîdarî ra hesab biperso û haştîye bipawo. Wayîrvejîyayîşê haştîye wayîrvejîyayîşê ameyoxî yo. Ganî ma vera nîjadperestîye, şerî, bêedaletîye, bêtêdûştîye bivejîye.''