Roniştişê dewaya Denîze Poyraz ewro Mehkemeya Cezaya Girane ya Îzmîrî de dest pêkeno. Cinîyan destpêkerdişê roniştişî ra dima verê Edlîyeya Bayrakli ya Îzmîrî de çapemenîye rê eşkerayîye daye.

Hemsereka HDPyî Pervîne Buldan, Vervatoxa Meclîsê Cinîyan ê HDPyî Ayşe Acar Başaran, Serekwekîla Koma HDPyî Merale Daniş Beştaş, endamê MYKyî yê HDPyî, Hemsereka DBPyî Salîha Aydenîz, Hetkara Serekê CHPyî Gulîzare Bîçer, Wekîlê CHPyî Sezgîn Tanrikulu, Hemvervatoxa HDKyî Esengule Demîr, Serekê TÎPî Erkan Baş zî tede xeylêk temsîlkarê partîyan û rêxistinan eşkerayîye de amade bîyî.

Pervîne Buldane eşkerayîye wende û vat: ''Kiştox Gencer seba kaosî erşawîya bînaya ma. Labelê şaranê Tirkîya kaos red kerd û bi mîlyonan kesî bîyî Denîze Poyraz. Vateyanê nefret, kîn, xirabî û heqaretanê îqtîdarî kerd ke Denîze bikişîya. Ma soz danê Denîze ke kiştoxê ci û hêzê peyê kiştoxî do hesab bidê. Ma seba haştîye, demokrasî û edaletî xîret kenê. Terefgîrê şer û kaosî wa bizanê ke ma do qetî demokrasî, huqûq û edaletî ra fek vera medê.''