Kongreya 12ine ya PKKyî mabênê 5-7ê gulane de Herêmanê Pawitişî yê Medya de amebî kerdene.

Hemserekê Konseya Rayberdişî ya KCKyî Cemîl Bayikî hîsê xo yê serê biranê kongre wina ardî ziwanî:

‘’Seke embazî zanenê destpêkê nê têgêrayîşî ra ez ha mîyanê ci de ya. Embaz Kemal Pîrî ez bi Rayber Apoyî dabi şinasnayene. Heta ke Rayber Apo şinasna mi ne Kurdistan ne şarê kurdî fam kerdibi. Dima ke mi o şinasna û tede qisey kerd şarê kurdî fam kerd. Coka destpêkî ra nata mi Rayber Apo xo rê kerd esas.

Rayraşîyayîşê mi sey zerrîya Rayber Apoyî nêbo zî, xeyê kêmasî û şaşîyê mi est bê zî qetî mi apey game nêeşte. Mi waşt le kêmasîyî werte ra wedarna û layîqê Rayber Apoyî biba.

Wexto ke mi Rayber Apo şinasna, kelecan û coşêko pîl mi de virazîya. Wexto ke PKK awan bi zî heman coş û moralî mi de virazîya. 

Ma nika konreyêke kenê. Na kongre de feshkerdişê PKKyî û qedînayîşê têkoşînê çekdarî ser o ma birî girewtî. Ez sey ronayoxêkê nê têgêrayîşî ney ra kelecan gêna. Çunke ez Rayber Apoyî hol fam kena. Her gama ey seba şarê ma, têgêrayîşê ma, merdimatîye bi serkewtişî netîce daye. Dinya de bawerîya bi Rayber Apoyî pîlêr bena. Senî ke mi bi şinasnayîşê Rayber Apoyî xo şinasna û rayraşîyayîşê xo ey reyde dewam kerd; Ez ancî bêra dinya do ancî Rayber Apoyî xo rê bikera esas. Ez eşkena bi kilmî naye vaja; Bijî Rêber Apo, bijî PKK."