Hemsereka Pêroyî ya HDPyî Pervîne Buldan çarçewa Bernameyê 'Ma HDP yê, her ca de yê' Kocaelî de şar û rêxistinan reyde kom bîye. Pêvînayîş de verî Hemserekê HDPyî yê Kocaelî Mehmet Selîm Akbogayî qisey kerd û ard ziwan ke ê do vera tedayan milê xo nêarê warî. Dima Wekîlê HDPyî yê Kocaelî Omer Faruk Gergerlîogluyî qisey kerd û da zanayene ke îqtîdar wazeno îradeyê kurdan binpay bikero la ê do rayîr nêdê ney.

Pervîne Buldan zî pêvînayîş de qisey kerd û bale ante hêrişanê vera HDPyî, dewaya qefilnayîşî, fezleke, tehqîqat û Dewaya Kobanê ser. Buldane vat: ''Armancê înan bê HDP sîyaset kerdiş o. La her ke ê hêrişê HDPyî kenê ma benê xurtêr. Wa ê bêrê Kocaelî bivînê ke qefilnayîşê HDPyî mumkîn nîyo.''

Pervîne Buldan eşkera kerd ke ganî kurdî yewîya xo, hêzê demokrasî zî tewirê hemparî awan bikerê û vat: ''Eke kurdan yewîya xo awan bikerdêne nê hêrişê nîjadperestî nêameyêne kerdene, ziwan û kulturê kurdan wina qedexe nêbîyayêne. Ganî cade seba yewîye game bêra eştene.''

Buldane tecrîdê Îmraliyî vist vîrî û vat: ''Tecrîdê vera Birêz Ocalanî tesîrê pêro Tirkîya keno. Senî ke ma seba azadîya Gergelîogluyî têkoşîn kerd ganî ma seba azadîya embazanê bînan zî têkoşîn bikerê. Seba ke rayîrê çareserîye bêrê girewtene Birêz Ocalanî Îmrali de yeno tecrîdkerdene. Ma do tim vera tecrîdî têkoşîn bikerê. Meseleya kurdan têna meseleya HDPyî nîya. Meseleya pêro partî, dezgeh û rêxistinan a. Ganî na babete de polîtîkayê hîna çêr, qerardarî bêrê kerdene. Sîstemo demokratîk pê çareserîya demokratîke ya meseleya kurdan mumkîn a.''