Hemserekan derheqê serragêrayîşê dîyinî yê Darbeyê 4ê Teşrîna peyêne de merkezê pêroyî de kombîyayîşêkê çapemenî viraşt.

 ‘HEMVERÊ ŞARÎ DE OPERASYONÊ SARAY’

Buldane vat ke no operasyon dewamê teşebusê darbeyî yo, amacê ci zî krîmînalîzekerdişê HDPyî yo. No heman wext de operasyonêk o ke hemverê şarî de ameyo kerdene.

Buldane vat: “Şarê kurdî tarîxê 2yê Adare de darbeyê DEPî ciwîya! Înan 4ê Teşrîna peyêne de nê darbeyî açarna Darbeyê Sarayî.  Kesê ke sey rehîn ameyê girewtene embazê ma yê ke şarî rê omîd vila kerdêne bîyî. Buldane nê vatî:  

'KESÊ KE OMÎD DAYÊNE ŞARÎ REHÎN AMEYÎ GIREWTENE'

“Bitaybetî zî Selahattîn Demîrtaş ê rayberan ra yew bi ke şarî rê omîd dayêne, înan bi rehîn girewtişê ê waşt ke cesaretê ci bişiknê. Reyna Fîgen Yuksekdage omîdê xoverdayîşê cinîyan bîye. Birêz Îdrîs Baluken pawitoxo bêters ê prosesê çareserîya demokratîke bî. Embaza ma Gultan Kişanake zî embazêka ma ya xoverdayoxe bîye na yewe ra înan aye zî rehîn girewte.”

ÇIQA TERSAYÎ HENDE BÎYÎ HÊRIŞKAR

Buldane vat seba ke rejimê AKPyî rayraşîyayîşê şarî yê ver bi îqtîdarî ra tersa û nê operasyonî viraştî û vat: “Înanê ke qirkerdişê Roboskî, Gezî û Soma viraştê teber de yê, êyê ke demokrasî wazenê û şarî pawenê zere de yê.” 

'NAMEYÊ NÊ FAŞÎZM O'

Temellîyî zî vat: “No îqtîdar seva ke sîyasetê demokratî tasfîye bikero xebetêno, o zî zano ke rayîrê nê zî tasfîyekerdişê HDPyî ra vêreno, la ma do destûr nêdê ci.

6 hezarî embazê ma, 53 hemserekê şaredarîyanê ma nika zindan de yê. 96 şaredarîyanê ma rê qeyûm ame tayînkerdene. No faşîzmê rejimê otorîterî yo. Dormeyê ke demokrasî de yenê têhet wextêkê tewr kilmî de do cewabê îqtîdarî bidê. Ma veng danê şarê xo wayî ro parlamenteranê xo vejîyê û îradeyê xo yê sîyasîyî vejîyê. ”

Peynî de zî Temellîyî vat ke ganî tavilî parlamentera tepiştî Leyla Guvene bêro veradayene.