Endamê Heyetê Rayberdişî yê  Têgêrayîşê Şorişgêr ê Yewbîyayeyî yê Şaran (HBDH) Ferzad Canî bi wesîleya serrgêra ronayîşê HBDHyî ya 5ine ANFyî rê qisey kerd.

Canî vist vîrî ke têgêrayîşê înan 12ê adar a 2016î de ame ronayene û vat: ''Têgêrayîşê ma bitaybetî no tarîx vîjna ke xo sey teqîpkarê mîrasê sosyalîzmê Tirkîya û Kurdîstan pênas keno. 12ê adare tarîxêko girîng o. Xora serhildanê vera qirkerdişanê Gazî û Qamişlo zî nê tarîxî de ameyî kerdene. HBDH îradeyê persayîşê hesabê nê qirkerdişan ramojna.

Kurdîstan de xeylêk wexto ke şorişêk esto. Semedê serkewtişî şorişêko yewbîyaye hewce kerdene. HBDH bi na îdîa vejîya werte. Roja ronayîşê xo ra bedelê girdî dayî û derbeyê girdî dayî dişmenî ro. Endamanê ma yê ronayoxan ra Delale Amed, hemra Atakan, Baran Serhat, Ulaş Bayraktaroglu, Ulaş Adali, Aynure, Cerene û hemra Taylan û xeylêk amebezê bînî ma mîyanê têkoşînî de bêpeynîye rê kerdî raşte.

Dewleta tirke ya faşîste bi heme hêzê xo wazena ke şorişê Rojawanî yo ke şarê Rojhelatê Mîyanênî sey umid vîneno bifatisno. Rejîmo faşîst fatûrayê nê şerî zî şarê ma rê vejeno. Bi nê hêrişanê faşîstan wazenê ke komelî teslîm bigerê. Vera naye têkoşîno biçeke şert o. Ganî şarî vera hêrişan wirze payan ser.  Heta ke xoverdayîş çînê bo  û hesab mero persayene xelisnayîş nêbeno. Ganî şarî û îtîqatê cîya cîyayî binê  beyraqê HBDHyî de bêrê têhet. Ganî ma koyan de û bajran de têkoşînê gerîlayî xurt bikerê û meydanan û kuçeyan zî camerverdê. Ganî ma her ca de vera polîtîkayanê çînkerdişî yê rejîmê faşîstî de bi qeradarîya girde têkoşîn bikerê.

Îqtîdaro faşîst ê AKP-MHPyî vera şaran dest pê hêrişê topyekunî kerd. Semedê pawitişê îqtîdarê xo şerî sey xelisyayîşî vînenê. Şar vêşanîye ra meydanan de bedenê tafîneno. Îqtîdaro ke zano nêeşkeno nê krîzî ra vejîyo polîtîkya şerî ray ra beno. Wa şarê ma hol bizeno ke fatisnayîşê şorişê Rojawanî û Lîbya rê leşker şawitiş ra înan rê feydeyêk çîn o, têna înan hetê ekonomî ra keno neçar. Ganî kedkarê Tirkîya vera zextê dewelte tewrê têgêrayîşê ma bê û paştî bidê ma ke no zîhnîyeto faşîst werte ra bêro wedartene. Ma zanê ke rayîrê Tirkîyaya Demokratîke û Kurdîstanê Azadî têkoşînî ra ravêreno. HBDH do na xete de bi qerardarîya girde  aver şiro.''