Kubra Solhana ke kênaya xoverdayoxê grevê vêşanîye yê Strasbourgî Kerem Solhanî ya beşdarê çalakîye bîye û vengdayîş bi dezgehanê Ewropa kerd ke berpirsîyarîyanê xo bîyarê ca.

Canneso ke Festîvala Fîlman a Mîyanneteweyî ya 72'ine dewam kena, ûca ciwanan ê Kurdan stand akerd û bale ante serê grevê vêşanîye yê vera tecrîdkerdişê Rayberê Şarê Kurdî Abdullah Ocalanî.  Ciwanan fotografê Ocalanî, Leyla Guvene û 30 tepişteyanê ke rojeyê mergî de yê stand de akerdî û vilawekî vila kerdî.

Kubra Solhane: Ma wazenê bibê vengê çalakgeran

Kubra Solhana kênaya xoverdayoxê grevê vêşanîye Kerem Solhanî zî tewrê çalakîye bîye û ard ziwan, waştişê înan wedaritişê tecrîdkerdişê Ocalanî yo.

Solhane vat, “Pîyê mi 155 rojî yo Strasbourg de grevê vêşanîye de yo. Seba ke ma vengê înan bidê heşnayene ma çalakîye virazenê. Ma wazenê tecrîdê serê Ocalanî bêro wedaritene. Wa êdî Ewropa zî nê vengî biheşno. Seba Festîvala Fîlman a Cannesî her cayê dinya ra merdimî tîya yê. Ma na çalakîye seba ke girseyêko hîratir biheşno kenê.”

Bi nameyê Meclîsê Ciwanan ê Draguîgnanî Nehîr Balikçi zî qisey kerd ke ê wazenê bale biancê serê tecrîdî û vat, “Bi vilakerdişê vilawekan ma wazenê derheqê Ocalanî û grevanê vêşanîye de zanayîşan bidê merdimanê ke tewrê festîvale bîyê. Balikçi da zanayene, ganî tecrîdê serê Oclanî cade bêro wedaritene û zextê serê tepişteyan bêrê qedênayene.

Kurdistanija bi nameyê Songul Şahîne zî ard ziwan ke amancê înan wedaritişê tecrîdî yo.