Endama Komîsyonê Zîndanan ê  ÎHD'yî Zelal Demîraye da zanayene ke, tepişteyê nêweşî têna wextê muracatî derheqê înan de yan zî xeberanê derheqê mergê înan de kewenê rojdem û va: "Kifş o dewlete bawer nêkena ke tepişteyê nêweşî nêweş ê. Naye ra zafê muracatanê ma red kenê. Dimayê nê redkerdişan zî xeberanê mergê tepişteyan yenê, labelê dewlete xo qet sey berpirsîyara mergan nêvînena."

Demîraye bael ante serê Muhsîn Kizilkano ke Zindanê Osmanîye de wefat kerd û va: ‘‘ Ma seba Kizilkayayî zaf reyan muracat kerd labelê netîce nêame vurnayene. Goreyê madeya 16'ine ya qanûnê înfazî eke tepişteyêk rîyê nêweşîyêkî ra nêeşke têna bi sereyê xo zindan de bimano ganî cezaya ci bêra taloqkerdene. Na babete de nêbeno ke teyna dezgehêk qerar bide yan zî têna Dezgehê Tipa Edlî qerar bide. Ma naye her tim anê ziwan. Zindanê Osmanîye de rewşa tepişte Sabrî Kaya her roje giran bena. Çend hewteyan ra ver ma rê nameyêk erşawit û nuşt ke rewşa ey beno giran. Naye ra ber 21 tepişteyê bînî yê nêweşî herême de estê. Mîyanê înan de tepişteyê ke dimayê grevê vêşanî nêweş kewtî zî estê. Rewşa înan a weşîye hema baş nêbîya. Mîyanê nê şert û mercan de zî do baş nêba. Tepişteyê nêweşî Tirkîya de sey hacetê sîyasîyî yenê şuxulnayene. Naye ra muracatî yenê redkerdene. Na rewşe çarçeweya heqanê merdiman de nêna qebulkerdene."