Bajarê Cenevre yê Swîsre de vera tecrîdê serê Rayberê Şarê Kurdî Abdullah Ocalanî verê Kîmîserîya Berze ya Heqanê Merdiman de rayraşîyîş ame kerdene. Çalakîye de semedê Mazlûm Dag û Abdurrahman Eri yê ke Zîndanê Hewlêrî de di aşmî yo vera binpaykerdişê heqan grevê vêşanîye de yê, ame vengdayene.

Kurdîstanijê ke bi vengdayîşê Merkezê Komelê Demokratîkî yê Kurdan ê Cenevre meydanê Place de la Navigationî de ameyî têhet ver bi meydanê Palais Wilsonî yo ke Komîserîya Berze ya Heqanê Merdiman (OHCR) a Neteweyanê Yewbîyayeyan (NY) tede yo, rayra şîyî.

Tîya bi eşkerayîyêke bale ameye antene serê tecrîdê giranî yê Îmraliyî ser û veng dîya CPT, OHCR û dezgehanê eleqedaran ê bînan ke wa berpirsîyarîya xo bîyarê ca.

Çalakîye de semedê caardişê waştişanê  Mazlûm Dag û Abdurrahman Erî yê ke bîlasebeb Zîndanê Hewlêrî de yenê tepiştene û di aşmî yo vera binpaykerdişê heqan grevê vêşanîye de yê, ame vengdayene.