Hemserekê HDPyî yê Amedî Zeyyat Ceylanî bale ante hêrişanê îşxalî û operasyonanê qirkerdişê sîyasîyî ser û pare kerd ke vera faşîzmî xoverdayîş est o.

Serekkomarê Tirkîya Erdoganî no hewte reyna Rojawanî rê gef wend û vat ke ê hê amadekarîya îşxalêkê neweyî kenê. Hetê bînî ra Başûrê Kurdîstanî de zî hêrişê îşxalî yê dewleta tirke dewam kenê û Vakurê Kurdîstanî de zî operasyonê qirkerdişê sîyasîyî zêdîyayî.

Hemserekê HDPyî yê Amedî Zeyyat Ceylanî derheqê babete de ANFyî rê qisey kerd. 

Ceylanî îfade kerd ke hêzê herêmî yê sey Sûrîye, Îran û Iraq hemkarîya polîtîkayanê Tirkîya yê vera kurdan kenê û vat: ''Şerê Diyînî yê Dinya de şarê armenî, êzidî û sûryanîyî ameybî qirkerdene. Nika zî kurdî binê tehlukeyê qirkerdişî de yê. Ewro bê destûrê Amerîka û Rûsya çew nêeşkeno bombayan bierzo Dihok, Şingal û Efrînî. Îqtîdarê AKP-MHPyî nê prosesî de hêzanê herêmîyan û mîyanneteweyîyan de pê kerdo ke netîce bigêro. Îqtîdar armanc keno ke teber û zere de kaosan virazo û bi nê hawayî îqtîdarê xo rê dewam bikero. Nika warê ekonomî, sîyasî û komelkî de krîzê pîlî est ê, rijîyayîş est o. Xora nê şertan de seba ke ê kurdan sey astengîye vînenê, dest pê hêrişanê wina hîra û têmîyanan kenê.''

Ceylanî ard ziwan ke qedexeyê sîyasî, tedaya serê zîndanan û tecrîdê Îmraliyî dewam keno la xoverdayîşêko komelkî zî est o. Ceylanî vat: ''Polîtîkayê faşîzanî ser nêkewtî. Ma pê bawer ê ke tewiro xurt ê komelî do pîl bibo, serrê 2022 û 2023yî bibê serrê haştîye û demokrasî. Eke komel û muxalefet hol nêrê rêxistinkerdene, şansê AKP-MHPyî nêmaneno ke nêşoro. Ma pê bawer ê ke xîretê ma do biresê netîceyêke û ma serkewtişî bîyarê şaranê Kurdîstan û Tirkîya.''