Hêrişê îşxalî yê dewleta tirke yê vera Zap, Avaşîn û Metîna dewam kenê û her ke şino bîlançoya hêrişan bena giranêr.

Goreyê xebera Ajansê Mezopotamya 4 rojanê peyênan de 27 cenazayê leşkeranê tirkan ameyê berdene bi nêweşxaneyanê Colemêrg û Geverî. Dîya zanayene ke cenazayî Meydanê Teyarayan ê Selahattîn Eyyubîyî ra pê teyarayanê kargoyî erşawîyenê welatanê leşkeran.

Goreyê agahîyanê ke qoricîyanê operasyonî dayê, pêkewtişî bi taybetî warê Zapî de giran bîyê. Qoricîyan îfade kerd ke pêkewtişanê giranan ra cenazayî bi rojan erazî de manenê. Qoricîyan pare kerd ke 150 leşkerê birîndarî zî Tugayê Komandoyanê Koyan de tedawî benê.