Bado ke Hemşaredarê Colemêrgî Mehmet Siddik Akiş ame destbendkerdene û herin da ci de qeyûm ame cakerdene sere de Colemêrg her hetî ra vera xespkerdişê îradeyê şarî çalakîyanê protestoyî dest pêkerd.  Ewro merkezê Colemêrgî de serkêşîya partîyanê sîyasîyan û rêxistinanê komelê sîvîlî de çalakîye ameye kerdene. Hemserekê Pêroyî yê DBPyî Çîgdeme Kiliçgun Uçar û Keskîn Bayindir, Hemsereka Pêroyî ya DEM Partî Tulaye Hatimogullari, pabesteyê Îtîfaqê Kede û Azadîye, heyetê CHPyî  û xeylêk temsîlkarê rêxistinê komelê sîvîlî tewrê çalakîye bîyî.

Bado ke eşkerayîye ameye dayene şar merkezê bajarî ra ver bi banê şaredarîye bi slogananê xoverdayîşî rayra şi.  Dima çalakîya roniştişî ameye kerdene. Polîsan bi bombayanê gazî hêriş ker. Ciwanan tay kuçeyan de bi kerraya cewabê hêrişê polîsan da. Polîsan bi gazî hêrişê wekîlan zî kerd. Rojnameger Newroz Seyitoglu netîceya şîdetê polîsan de xora şi. Şar kuçeyan ra bi vila û xover da. Wekîlî kuçeyan ra vila bîyî qolanê cîyayan ra rayraşîyayîş kerd.

Keskîn Bayindirî ke çalakîye de qisey kerd nê vatî:  ''Reyna îradeyê şarî ame xespkerdene, qeyûm ame cakerdene. Ma nê qeyûmî qebûl nêkenê. No sîstem do xeyrê têkoşînê şarê kurdî birijîyo.  Seserrî yo ke îradeyê kurdan nîno naskerdene. Ewro zî Bahçelî vano ê do îradeyê  şarê kurdî nas mêkerê. Wa biewnî tarîxê kurdan ra; Erdogan û Bahçelî do şirê la kurdî tîya bimanê. Ma do bi îrade û hêzê xo sîstemê înan birijnê.''

Tulaye Hatimogullari zî nê vatî: AKP bi cakerdişê qeyûmî vano ke 'heqê to yê weçînayîşî çîn o.' Vano 'ti hemwelatîyê/a nê welatî nîyî/a.'  Ewro Bahçelî qal erzeno DEM Partî, Wezîrê Karanê Zereyî pîroz keno. Çeteyanê sey xo pîroz keno. Ma nê çirey qebûl nêkenê. Ma huqûqê çeteyan red kenê. Nê welatî de do demokrasî ser bikewo, azadîye ser bikewê. Şar Ser bikewo. Qeyûmê Colemêrgî têna vera îradeyê kurdan nîyo, no qeyûm vera demokrasîyê Tirkîya, vara qanûnê îradeyanê herêmîyan o. Ganî vera nê zîhnîyetê qeyûmî heme hêzê demokrasîyî tewir ramojnê.  Ma do pêro pîya vera faşîzmî xover bidê û ser bikewê.''