Vera tecrîdê giranî yê serê Rayberê Şarê Kurdî Abdullah Ocalanî 18ê teşrîna peyêne de do ver bi Gemlîkî ‘Rayraşîyayîşê Azadîye’ bêro kerdene. Şarê Colemêrgî vera tecrîdê Îmraliyî nêrazîbîyayîş mojna û semedê tewrbîyayîşê rayraşîyayîşî veng da.

Hemwelatîyan ra Metin Demirelî tecrîd sey caardişê vera merdimîye name kerde û ard ziwan ke ê do çirey tecrîdî qebul  nêkerê. Demirelî ard ziwan ke ganî şarê kurdî vera tecrîdî bêveng memano û vat, “Seba ke tecrîd bêro wedaritene ganî ma pêro pîya wirzê payan ser. Neheqîya pîlê kurdan rê yena kerdene. Coka me nê qebul nêkenê. Ganî heme kurdî 18ê teşrîna peyêne de verê xo bidê Gemlikî û tewrê  ‘Rayraşîyayîşê Azadîye’ bibê. Çunke ma tecrîdê serê Rayberîye qebul nêkenê.”

Mehmet Emin Ulutaşî zî tecrîd sey sûcê merdimîye hesibna û vat, “Caardişê tecrîdî nîno qebulkerdene û ganî qet kesêk binê tecrîdî nêro tepiştene. Seba ke tecrîdê serê Rayberîye bêro wedaritene ganî şarê kurdî, keyeyî, avukatî, sîyasetmedarî, rêxistinê komelê sîvîlî û her kes bêro têhet. Rayberîye semedê haştîya Rojhelatê Mîyanênî firsetêko pîl o. Ganî kurd û tirkî nê bîgê çiman ver û semedê wedarişê tecrîdî pîya têbigêrê. Ma tecrîdî qebul nêkenê. 18ê teşrîna peyêne de ganî kurdî wirzê payan ser, pêro pîya şirê Imrali û yew fekî ra vejê ma tecrîdî qebul nêkenê.”

Xanime Sezen zî vera tecrîdî hêrsê xo ard ziwan û vat, “Bi mîlyonan kurdî wazenê ke Abdullah Ocalan serbest bêro veradayene. Ma sey kurdan çirey milê xo çewt nêkerd.  Têna kurdî nê heme şarê bindestî yê dinya peyê Rayberîya ma de yê û wazenê wa serbest bêro veradayene. Ewro serê şarê kurdî de zulmo gird est o. Ma qetî nê zulmî qebul nêkenê. Kam se keno wa bikero, şarê kurdî ra pîlêr nîyo. Şarê kurdî do tim bibo. Ma tecrîdê serê Rayberîya xo qebul nêkenê. Serkewtiş do bibo ê şarê kurdî. Ganî her kes semedê Rayraşîyayîşê Gemlîkî bibo seferber.  Bi nê rayraşîyayîşî wa heme dinya vengê ma bieşnawo.”

Mesude Ağırtaş zî semedê terbîyayîşê rayraşîyayîşê 18ê teşrîna peyêne veng da û vat, “Ez bi xo zaf wazenê tewrê nê rayraşîyayîşî bibî. Ma haştîye wazenê la ê nêwazenê wa haştîye bêro. Coka tecrîd kenê.”

Mehmet Demirî zî tecrîd sey zulum û bêadaletîye name kerd û vat ganî qet kesêk tecrîdî qebul nêkero.