Hêrişê îşxalî yew dewleta tirke yê vera Başûrê Kurdîstanî dewam kenê. Heta nika xeylêk sîvîlî ameyî qetilkerdene.

Tîma Haştîye ya Xiristîyanan - Christian Peacemaker Teams (CPT) derheqê hêrişê artêşa tirke de raporêk weşana. Goreyê raporî mabênê 21ê gulane û 21ê hezîrana 2022yî de artêşa  tirke 3ê înan domanî 5 sîvlî şehîd kerdî û 15 kesî zî birîndar bîyî.

Rapor de ame vatene ke 21ê gulane de dewa Tuteqelî ya Çemçemalî de hêrişê hewayî ame kerdene û di sîvîlî şehîd bîyî badê hêrişî 8 keyeyê ke dewe de ciwîyayêne tersê hêrişê dewleta tirke ra dewa xo ra vejîyayî.

Rapor de dîya zanayene çarçewaya operasyonê peyênî Tirkîya herêmanê Avaşîn û Zapî 4 baregehê leşkerî înşa kerd û 16ê hezîrane ra nata koyê Kurejahroyî de yewna baregeh yeno viraştene.

Goreyê raporê CPTyî qirkerdişê vera Bamerne yo ke 26ê gulana 2022yî de ame kerdene û 3 domanî ameyî qetilkerdene, hetê dewleta tirke ra ame kerdene.

Rapor de dîya eşnawitene  ke leşkerê tirkan tim baregehan ra dewan danê bombayan ver, dewanê ser o tim guleyî yenê varnayene û ame vatene ke mabênê 15-17ê hezîrana 2022yî de netîceya hêrişê dewleta tirke de Derkar de 5 û Kanî masî de 1 sîvîl birîndar bîyî.