Tesîrê roportajê ma yê bi CPTyî dewam kenê. Avûkatanê Buroyê Huqûqî yê Asrinî ra Razîye Ozturk eşkerayîyê CPTyî ANFyî rê ercnayî.

Razîye da zanayene ke netîceya çalakîyanê şarê kurdî de CPTyî qebul kerdo ke nê roportajî bido û vat: ''Girîng o ke CPT ameyo na noqta. La CPTyî roportaj de wina mojnayo ke seke Zîndanê Îmraliyî de muameleya xirabe çin a. CPTyî vato ke personelê zîndanî têgêrayîşanê xo de hol ê; teyna pêvînayîşî nênê kerdene. Nê qiseyê ci û tesbît-pêşnîyazê ci yê verênî û birê MHME yewbînan nêtepişenê. Muwekîlanê ma ra qasê 40 mengî yo xeberêke nêna girewtene. 

Verê cû CPTyî eşkera kerdbî ke şertê Îmraliyî goreyê standartanê heqanê merdiman nîyê.  Raşta zî verê muwekîlanê ma de birê rejîmê înfazê girankerdeyî zî nênê caardene. Rejîmê înfazê girankerdeyî de tepişteyî eşkenê keye û avûkatanê xo bivînê. Îmrali de îşkence est o. CPTyî vatbi nê îşkenceyî ra madeya hîrêyîne ya Peymana Heqanê Merdiman a Ewropa yena binpaykerdene. Nika rewşa Îmraliyî ney ra wetêr a.''

Razîye pare kerd ke îşkenceyê vera Rayberê Şarê Kurdî Abdullah Ocalanî tesîrê pêro şarê kurdî keno û vat: ''Têkilîya muwekîlanê ma ya bi teberî bi temamî birîyaya. Pozîsyonê lîderîya Birêz Ocalanî ra pêro şarê kurdî binê tesîrê na rewşe de maneno. Ma verê cû zî vatbi ke Tirkîya qetî pêşnîyaz û biranê CPTyî nêana ca. Coka eke biwazo CPT eşkeno verê Tirkîya de prosedûrêk bîyaro ca. Xora meseleya Azerbaycanî de CPTyî wina kerd. La ma vînenê ke babeta Tirkîya de CPT dirîtîye keno.''

Razîye vist vîrî ke mîyanê ajandaya zîyaretanê CPTyî yê 2025î de Tirkîya çin a û vat: ''Heyf ke rixmê kerdişanê xiraban zî CPT mîyanê ajandaya xo de Îmrali teber de verdeno.''