Komeleya Heqanê Mediman (ÎHD) Heyetê Pêroyî yo Asayî yê 21. bi şîarê “Mirov bi mafen xwe heye, İHD bi tekoşina xwe” Sahneyê Yilmaz Guneyê Şaredarîya Çanakaya de ame kerdene.

Mayê Haştîye, Serekê Pêroyî yê HEDEPî Tuncer Bakirhan, Maya Denîz Poyraz, Fehîme Poyraz, Wekîla HEDEPî yê Riha Dîlane Kurt, Nuştox Fîkret Başkaya, EMEP, KESK, Partîya Saadet, Komeleya Haştîye ya 1ê Teşrîna Verêne , ÇDH, Komeleya 78yan û Weqfê Haştîye ra xeylêk kesî tewrê kombîyayîşî bîyî.

Qiseykerdişê akerdişî hetê Sekreterê Pêroyî yê ÎHDyî Huseyîn Balabanî ra ame kerdene. Nimete Tanrikulu, Fehime Poyraz, Hanife Yildiz, Berfine Elçi û Neylan Solmaz Saçilik dîwanî rê ameyî vîjnayene.

Dima ra Hemsereka Pêroyî ya ÎHDyî Erene Keskin qisey kerd. Keskine bale ante qewimîyayîşanê Kurdîstanî ser û vat: “Heta ke nîqaşê îdeolojîya fermî nêrê kerdene haştîye nîna. Tirkîya û çar paçeyanê bînan de meseleya Kurdîstanî est a. Na têna meseleya coğrafyaya ma nîya. Çar parçeyan de zîhnîyeto serdest wazeno kurdan çîn bikero. Ewro Rojhelatê Mîyanênî de dejo zaf giran est o. Îsraîl bi terorê dewleta kena ke Filistinî çîn bikero. Nê welatî de tay kesêke xo rê vanê muxalîf qirkerdişê Filistinî vînenî la qirkerdişê Rojawanî nêvînenî.” 

Hemsereko verên ê ÎHDyî Ozturk Turkdogan zî vat: “Ma rayena fînenî vîrî ke, çew vera kamî şer bikero, ganî ey reyde bêro wêre. Ma nê çemberê adirî yê Rojhelatê Mîyanênî de qet nêbo wazenê Kurdîstanî de haştîye bivînê. Ma do tecrîdê Îmraliyî xo vîra mekerê. Ma do semedê şiknayîşê tecrîdê serê Rayberê Şarê Kurdî Abdullah Ocalanî û embazanê ci têkoşînî bidê domnayene.”