Seba Denîze Poyraza ke bînaya HDPyî ya Îzmîrî de ameye qetilkerdene taxa Çîmentepe ya qezaya Konakî de verê temsîlkarîya HDPyî de xeyma serweşîye ameye akerdene. Dadî û babîyê Denîze Fehîme û Abdullah Poyraz, wekîlê HDPyî Serpîle Kemalbay, Murat Çepnî û endamê partîye meymanan pêşwazî kenê.

Endamanê Komîsyonê Cinîyan ê CHPyî Fîgen Nazîfe Karahan, Tûgba Donmez, Kîmete Batmaz xeyme zîyaret kerdî.

Dadîya Sêvê Demîra ke Silopî de amebî qetilkerdene, Sakîne Demîr zî xeyma serweşîye ya keyeyê Denîze Poyraz zîyaret kerde. Sakîne Demîr vat: ''Sêvê, Hevrîne Xelef, Denîze, Pakîze, Fatma û bi hezaran cinîyî ameyî qetilkerdene. Bi hezaran zî cayê înan girewt. Ganî kurdî yewîya xo xurt bikerê, xoverdayîşê xo rê dewam bikerê. Serkewtiş do ê şarê ma bibo. Şehîdî nêmirenê.''

Zîyaretê serweşîye dewam kenê.