Saetanê serê sibayî de hêrişkero bi nameyê Onur Gencerî hêrişê bînaya HDPyî ya Îzmîrî kerd. Hêrişkerî xebatkare Denîze Poyraz qetilkerd û bîna da adir ver.

Goreyê xebara JinNewsî dayîka Denîze Poyraz, Fehîme Poyraz şîye bînaya partîye ke kênaya xo bîvîne la polîsan destûr nêda.

Dayeke Poyraze vat: ''Bîlasebeb kênaya mi qetil kerde. Hem kênaya mi qetil kerda, hem zî nêverdenê ez aye bîvînê. Berê akerê ez şina zere. Çew nêeşkeno mi vindarno. Domana mi mirênayê. Çi heqê şima estbi, şima domana mi qetil kerde. Hûma zî do şima bimirnê înşalah. Ez dayîk a, heqê mi yê qiseykerdişî esto. Wa çew mi rê mevajo vengê xo meveje.''

Dayîke Poyraze vat: ''Şarê kurdî tim payan ser o, do tim pay ra bo. Denîzêke şîye, Hezar Denîze do bêrê.''

HDPyîjê ke verê bînaya ke raştê hêrişî ameye de ameyî pêser pê vatişê ''şima qetilkaran pawenê'' vera polîsan nêrazîbîyayîş ramojna.