Gerîlayê HPGyî Egîd Îpek 2017 de şehîd bibi û esteyê cenazaya ci nîsana 2020î de bi kargoyî erşawîyabî dadîya ci Halîse Aksoy. Dewleta tirke pê nê kerdişî xo yê barbarî qîm nêkerd û vera dayîke Halîse Aksoy hêrişanê xo yê sîstematîkan rê dewam kerd.

24ê kanûna 2020î de polîsan eşt keyeyê Halîse Aksoy ser û dest na fotografanê Egîd Îpekî ser. 4ê adara 2022yî û 18ê gulana 2022yî de zî Halîse Aksoy pê îşkenceyî ameye destbendkerdene. 

25ê nîsana 2023yî de operasyonê destbendkerdişan de Halîse Aksoy zî Amed de amebî destbendkerdene û 28ê nîsane de zî kênaya xo Mizgîne Karataş reyde 'endamîya rêxistine' ra tepişîyabî.

Goreyê xebera Ajansê Mezopotamya dayîke Halîse Aksoy zîndanî ra mesajê xo yê verênî de wina vat: ''Sereyê xo mearê war, xo ver bidê.''

Zamayê dayîke Halîse Harun Karataşo ke cinîya xo Mizgîne reyde amebi destbendkerdene la dima vera dîyabi wina qala sereştişî kerde: ''Serê sibayî saete 06.00 de polîsanê sivîlan û fermîyan eşt keyeyî ser. Polîsan ber şikit. Wexto ke dayîke Halîse tepişîyaye kênaya xo rê vana 'Sereyê xo meare war.' A vana do zîndan de zî xo ver bida. No seba ma zî mesajêk o.''

Harun Karataşo 37 serre yo ke lajê xo Çîya (4) reyde teyna mendo, pare kerd ke ê do tim xo ver bidê.

Avûkatê dayîke Halîse Necat Çîçekî ard ziwan ke muwekîla ci çarçewa îfadeyanê şahidê eşkerayî Umît Akbiyikî de tepişîyaya. Dayîke Halîse vat: ''Akbiyikî îdîa kerdo ke keyeyê Halîse Aksoy keyeyo asayî yo. Seba ke dayîke Halîse pê telefonî rojnamegeran de qisey kerdo, no sey sûcî hesibîyayo. Edlîye de persî ser o dayîke Halîse vato 'Lajê mi şehîd bîyo.' Mehkeme waşto ke Halîse Aksoy nê îfadeyî apey bigêra la a reyna vana 'Mi rê lajê mi şehîd o.' Bira tepiştişî ra dima zî aye vat 'Bijî Kurdîstan' û kênaya xo Mizgîne rê zî vat 'Sereyê xo verê înan de meare war.' ''