Dayîkan ê Haştîye bi şîarê ''Ma do tecrîdî birijne û cuya azade înşa bikere'' seba bale biancê merganê zîndanan ê ke zêdîyayî û tecrîdî ser Mêrdîn de ameyî pêser.Dayîka Garîba Gezer Halîme Gerzer zî tede dayîkî verê Edlîyeya Mêrdînî ameyî têhet. Mabênê dayîkan û polîsan de muneqeşe vejîya, dima ra dayîkî şîyî Parka Karayollari. Parlemterê HDPyî Remzîye Tosun û Semra Guzel zî tewrê çalakîye bîyî.

Hemsereka HDPyî ya Mêrdînî Perîhane Agaogluya ke çalakîye de qisey kerd bale ante tecrîd û merganê zîndanan ê ke rojanê peyênan de zêdîyayî ser û vat: ''Îqtîdar tepişteyanê nêwaşan sey rehînî tepişeno. Ganî tecrîd bêro wedaritene û tepişteyê nêweşî cade bêrê veradayene.''

Dayîka Haştîye Besna Gunay zî ard ziwan ke înan seba ke domanê înan zîndan de bimerê ê  nêeardî dinya û vat: ''Rixmo ke ma tim vera şerî veng danê, her roje zîndanan ra cenazayê neweyî vejîyenî. Wa hinî zerrîya dayîkan meveşîyo. Vanê tepişteyî xo kişenê. Ma zaf hole zanê ke wina nîyo. Nêzanê sebebê ci çîyo? Nêzanê sebanê ci kam o?''

Dayîka Garîbe Gezer Halîme Gezer zî ard ziwan ke kênaya ci xo nêkişto û vat: ''Kênaya mi ameye qetilkerdene. Şima senî hesabê naye danê? Şima kênaya mi ra çi waşt? Çîyo winayên dinya de nêame kerdene. Hem vêşan verdayiş hem zî qetilkerdiş. Şima her roje qetil kenê û vanê înan xo kişto. Ma çirey nê qebul nêkenê. Hinî bes o, domananê ma qetil mekerê. Şima di domanê mi qetil kerdî. Garîbeya mi nêmerd, serê sereyê mi de ciwîyena. Şima nê fotografê Garibe ra tersenê. Qet yew dînî de cayê naye çîn o. Şima cenzaya kênaya mi remnaye. Hinî bes o.''

Badê çalakîye şar bi sloganan ver bi banê HDPyî rayra şi. Polîsan verê çalakwanan girewt û vat ê desturê rayraşîyayîşî nêdanê. Gama ke şar kewt kuçeyê HDPyî polîsan rayê girewt. Çalakwanî xeylêk wext tîya vindetî û sloganî eştî. Dima ra mabênê şarî û polîsan de muneqeşe vejîya. Şar pê sloganan vila bi.