Garîbe Gezera ke Zîndanê Kandira de bi hewayêkê şikdarî dinyaya xo bedilnaye, Kerboran de bi tîlîlîyan ameye definkerdene. Birayê ci Emîn Gezerî vat: "Ma do sereberz vinderê." Dayîka ci Halîme Gezer zî vat: "A Garîbeya Kurdîstanî ya."
Garîbe Gezera ke Zîndanê Kandira yo ke tede raştê îşkence û hêrişan ameyêne de bi hewayêkê şikdarî dinyaya xo bedilnaye, cenazaya ci warê teyarayan ê Mêrdînî ra bi konvoyêkî ameye girewtene û Kerboran de bi tîlîlîyan ameye definkerdene.
Konvoyê cenaza têdima hetê polîsan ra ame vindarnayene û tacîzkerdene. Dargeçît de biseyan kesî vejîyayî rayîran ser û bi çapik û nîşanê serkewtişî cenaza selam kerde. Cenaza semedê sitişî mîyanê sixletîye ra ameye berdene Camîya Seyît Hasanî. Verê camî de sloganê ''Şehîdî nêmirenî'' û ''Ey şehîde gonîya to do erdî de memano'' bîyî berz.
Birayê Garîbe Gezer Mehmet Emîn Gezero ke pê guleyê polîsan felç bi, verê camî de xîtabê şarî kerd. Gezerî vat: ''Ma nêbermenê, sereberz vindenê. Cenazaya ma do erdî de memano.'' Dayîka Garîbe Gezere Halîme Gezer zî ard ziwan ke ê do mebermê û semedê tewrbîyayîşê cenaza şarî rê spas kerd.
Gama ke cenaza zere de ameyêne şitene verê berî de slogan û tîlîlîyan dewam kerd. Dima ra cenaza doşê cinîyan de ameye berdene Goriştanê Seyît Hasanî. Destûr nêdîya ke şar debikewo goristan la rixmê naye şar dekewt goristan. Gama ke cenaza ardîyaye cayê definkerdişî merdimanê ci deyîra ''Bûka Kurdîstanî'' vate. Badê caardişê vecîbîyanê dînîyan cenazaya Gezere kişta gorê birayê ci Bîlal Gezerî yo wextê çalakîyanê Kobanê yê 6-8ê Teşrîna Verêne de ame qetilkerdene de bi tîlîlîyan ameye definkerdene. Dayîke Gezere serê gorê kênaya xo de lawîkî vatî. Dayîke Gezera ke tîya xîtabê şarî kerd vat: ''A têna Garîbeya mi nîya. A Garîbeya Kurdîstanî ya.'' Badê definkerdişî şar bi sloganan şi keyeyê tezîye.
