Têgêrayîşê Cinîyan ê Azadan (TJA) derheqê şehadetê Garîbe Gezera ke Zîndanê Kandira de dinyaya xo bedilnaye de eşkerayîye daye. Eşkerayîya ke verê banê HDPyî yê Mêrdînî de ameye dayene pîya bi aktîvîstanê TJA xeylêk îdarekarê HDP, DBP û  MEBYA DERî yê bajarî tewrê ci bîyî.

Çalakîya ke pankarta  ''Ma sîya girênêdanê, sere wedarnenê, Garîbe Gezer bêmerg a'' ameye akerdene de fotografê Gezere û dovîzê sey ''Ma kiştoxan sarisnenî'' ameyî kiriştene. Hemsereka HDPyî ya Mêrdînî Perîhane Agaogluya ke tîya qisey kerd ard ziwan ke cinîyî do wayîrê têkoşînê Gezere bivejîyê û vat polîtîkayanê zextî yê dewlete Gezere qetil kerd. Dima ra Hemvervatoxa TJA ya Mêrdînî Eyleme Amak qisey kerd. Amake vat: ''Garîbe Gezer netîceya sîstemê înfazî û hêrişanê fîzîkî-cînsî de ameye qetilkerdene. Seba ke berpirsîyarî hesab bidê ganî derheqê heme berpirsîyarê dezgehê înfazî yê eleqedarî karî ra bêrê girewtene û derheqê înan de cipersayîş bêro destpêkerdene. Garîbe nêmerde, ameye mirênayene. Sere de tepişteyê nêweşî ma do pê têkoşînê xo cinîyê ke sey rehîneyan zîndan de yenê tepiştene azad bikerê.''