Çalakîya roniştişî ya dayîkan roja Sêşeme dimayê kombîyayîşî yê hewtane yê HDP’yî dest pêkerdibî. Dayîkî wazenê ke Wezaretê Edaletî reyde pêvînayîşî bikerê.

Parlamenterê HDP’yî Ayşe Acar Başarane û Necdet Îpekyuze şewa dîyine dayîkan reyde derbaz kerde. Roja Çarşeme saetanê şewe de Sedat Akino ke Hepisxaneyê Erzînganî yê Tîpê T’yî yê Girewte de dest bi grevê vêşanîye kerdo û bado çalakîya xo keyeyê xo yê Êlîhî de dewam keno, telefon akerd.  Akino ke 130 rojî yo grevê vêşanîye de yo vat, ”Beno ke ma hezar kesî bi mengan o grevê vêşanîye de yê; ma do qetî na çalakîye ra fek vera nêdê. Xoverdayîşê şima moral dano ma. Ma do pîya ser bikewê. “