Şîrketa Vilakerdişê Ceyranî ya Dîcle (DEDAŞ) Amed de bi kodê 49î (Seba ke karê xo nêkerê israr kenê) 100 karkerê ke vera şertanê xebate yê xiraban çalakîye de bîyê, bê tazmînatî karî ra vetî.

Sekreterê Pêroyî yê DÎSKî Atsizî da zanayene ke xebera karîravetişî pê mesajanê telefonî dîyaya karkeran, tazmînatê înan nêdîyeno.  Atsizî pare kerd ke karkerî seba ke tewrê çalakîya roniştişî ya vera şertanê xebate yê xiraban bîyê karî ra ameyê vetene.

Atsizî vat: ''Ganî bi hawayêkê fekkî yan zî bi hawayêkê nuştekî karkeran rê xebera karîravetişî biameyêne dayene. Kodê 49î sey gefî û bahane vera karkeran şuxilîyeno û karkerî bê sendîka yenê verdayene. Ma do vera DEDAŞî muracatê huqûqî bikerê û prosesî teqîb bikerê. Ma do verê DEDAŞî de eşkerayîye zî bidê.''

Hetê bînî ra selahîyetdaranê DEDAŞî îdîa kerd ke heqê înan est o ke bi kodê 49î karkeran karî ra vejê. 

Vizêr zî Riha de DEDAŞî 50 karkerî heman sebebî ra karî ra vetbî.