Erdlerzê 6ê sibate ra 12 rojî vîyarto, hema zî binê xirban de însanî est ê la dewleta ke cuya însanan xemê aye de nîyo, wazena bi kepçeyan ê xirban hewena. 

Îqtîdarê AKP-MHPyî wazeno herêmanê erdlerzî xo rê bikera cayê rantî. Parlamenterê HDPyî Saît Dedeyî ke roja verêne ra herême de yo, derheqê ney de ANFyî rê qisey kerd.

Semsûr de halêko xirab est o

Dedeyî ard vîradene ke, erdlerzî dima ca de bi heme partîya xo, biorganîze herêma erdlerzî ra vila bîyî û hewl danê ke birînanê şarê xo pîya bipêşê û vat, ‘‘Ma koordînasyonanê xo yê weçînayîşî yê bajaran tada masaya krîzî û ez zafane Semsûr de menda. Senî ke ma resayî Semsûrî, ma dî ke halêko zaf xirab est o la qet koordînasyon û organîzeyêk çin bî. Dîyar nêbî ke kam do se bikero. se ra 70-80ê Semsûrî rijîyaybî. Rojanê verênan de ceyran zî çin bî. Mîyanê xirban de bi hezaran însanî mendbî û êyê ke xelisyaybî zî serdan ver xirban ser o vinderte bîyî ke hetkarîyêk bêra û nasanê înan biveja. Tayê xirban de roja diyine de tayênan de zî roja hîrêyine de xebate dest pêkerde.’’

Herêma erdlerzî de îqtîdar çînbi

Saît Dedeyî ard ziwan ke, her kesî persayêne ke, ‘‘Ka dewlete kamca de ya, dewlete ewro çin ba key est a?’’ û vat, ‘‘Rasta zî dewlete uca de çin bî. La çar hetan ra zerrîwazî ameyî Semsûrî. Çar hetan ra TIRê hetkarîye ameyî. La îqtîdar heta 3 rojan zî uca çin bî. Dewleta ke çin bîyî, waştêne ke hetkarîya şarî rê zî biba asteng. Destê zerrîwazan ra çi ameyêne kerdêne la çi heyf ke keda înan zî qîm nêkerdêne. Êyê ke wezîfedar ê, çend rojan ra dima vejîyayî meydan’’

Çareserî, îderayê herêmî yo demokratîk o

Dedeyî vat, ‘‘Nika hîna zaf hewdecarîya cilanê zimistanî, konteynir, malzemeyê hîjyenî û werdî est a. Bi na felaketa girane ma reyna dî ke, çareserî, îdareyê herêmî yo demokratîk o’’