DEM Partî  banê xo yê Amedî de bi kombîyayîşê çapemenîye Deklerasyonê 1ê Êlule Roja Haştîye ya Dinya eşkera kerd. Wekîlê DEM Partî Serhat Eren, îdarekarê DEM Partî û DBPyî yê Amedî û aktîvîstê TJA tewrê kombîyayîşî bîyî.

Goreyê deklarasyonê ke ame eşkerakerdene. 1ê êlule de Amed, Îzmîr û Wan de do mîtîngî bêrê kerdene. Mîtîngê Amedî do Meydanê Şêx Seîdî de bêro kerdene. Verê ci zî do verê  AZC Plaza ra ver bi meydanî rayraşîyayîş bêro kerdene.

Kombîyayîş de verî Hemsereka DEM Partî Gulşene Ozer qisey kerd. Ozere ard ziwan ke şarê Rojhelatê Mîyanênî hewceyê haştîye û hûzûrî yê û vat ê do mîtîngan de şaran reyde bêrê têhet û govenda haştîye bigêrê.

Hemserekê DBPyî yê Amedî Mehmet Şîrîn Gubuzî nê vatî: ''Meseleya kurdan bi haştîya bianore eşkena bêro çareserkerdene. Seba ke haştîya komelkî bêro caardene ganî verî ma vera şerî bêrê têhet.  Rojdemo tewr muhîm oyo ke tecrîdê serê Birêz Abdullah Ocalanî bêro wedaritene. 1ê êlule de ma do saete 17:30 verê AZC Plaza de bêrê têhet û ver bi Meydanê Şêx Seîdî rayraşîyayîşê azadîye bikerê. Ma rayna vanê; semedê çareserkerdişê meseleya kurdan ganî warê demokratîkî de pêvînayîşî bêrê kerdene  û tecrîd bêro wedaritene.''

Wekîlê DEM Partî Serhat Eren zî ard ziwan ke xebatê seba 1ê êlule dewam kenê û nê vatî: ''Tirkîya de xeylêk waran de bêedaletîye dewam kena. Her bêedalîtîye verê bêedaletîya bine akena. No zî verê şîdetî akeno. Tirkîya de xeylêk krîzî est ê. Krîzê komelkî, sîyasî, ekonomîk û edaletî dewam kenê. Her roje erjê demokratîkî yê komelî parçe parçe yenê kêmkerdene.''

Erenî bale ante hêrişanê verê kurdkî ser ke rojanê peyênan de zêdîyayî û nê vatî: ''Bêşik nê hêrişî pabesteyê hêrişanê vera Rojawanî û hêrişanê PDKyî yê. Hêrişê vera erjan û yewîya şaran, vera ziwan û muzîkê şarî çirey nînê qebulkerdene. Vera nê hêrişanê ke vera estbîyayîşê kurdan yenê kerdene ganî şarê ma 1ê êlule de vejîyo waran. Vera polîtîkayanê şerî yê îqtîdarî ma 1ê êlule de vejîyê waran.  Ma vejîyê waran û bi govendan û tîlîlîyanê xo wayîrê nasname û erjanê xo bivejîyê. Ma veng danê heme dezgehanê komelê sîvîlan bêrê ma vera neheqîye vengê xo bidê eşnawitene.''