Delegasyonê Huqûqnasanê Vera Tecrîdî yê Mîyanneteweyî ewro Amed de Nobeta Edaletî ya ke seba paştdayîşê grevê vêşanîye yê tepişteyan û seba wedaritişê tecrîdê Îmraliyî dîyabi destpêkerdene zîyaret kerd.

Zîyaret de Hemserekanê MED TUHAD-FEDî Kerem Canpolat û Emîne Kaya û dadîyan bi sloganê ''Bijî Berxwedana Zîndanan'' pêşwazî kerdî.

Dadîyan delegasyonî rê qalê binpaykerdişan û bêhuqûqîyan kerd û vat: ''Heta ke tecrîdê vera Birêz Abdullah Ocalanî nêqedo tedaya vera kurdan zî do nêqeda.'' Dadîyan vat ke CPT ameyo Tirkîya la Îmrali zîyaret nêkerdo coka ganî bêro şermezarkerdene. Dadîyan dewletanê Ewropa ra waşt ke Abdullah Ocalan destê dewleta tirke ra bigêrê û teslîmê dadîyan bikerê.

Delgasyonî dima DBP zîyaret kerd. Hemserekê DBPyî Keskîn Bayindir, Vervatoxa Meclîsê Cinîyan ê DBPyî Bêrîvane Bahçecî, Endama MYKyê DBPyî Narîne Gezgor pêşwazî kerdî.

Bayindirî zîyaret qalê vîzyon û mîsyonê partîya xo kerd. Bayindirî ard ziwan ke dewleta tirke bi tecrîdî nêçareserkerdişê meseleya kurdan de israr kena. Bayindirî vat: ''Birêz Abdullah Ocalanî ra hîrê serrî yo xeberêke nêna girewtene. Merkezê pêro meseleyan Îmrali yo. Ewro dinya seba azadîya Ocalanî xîret kena. Heta ke Birêz Ocalan azad nêbo qet yew meseleya Tirkîya zî çareser nêbena.''

Delegasyonî dîyar kerd ke ê do seba çareserîya meseleya kurdan paştî bidê partîye.