Heyetê Îdareyanê Cayîyan ê DEM Partî bi eşkerayîya nuştekîye vera qirkerdişê sîyasîyî nêrazîbîyayîş mojna.

Eşkerayîye de nê ameyî vatene: No îqtîdaro ke bêhuqûqîye û xespkerdişê îradeyî de sînor nêsarisneno vera partîya ma û temsîlkaranê ci hêrişê xo zêdînayî.

28ê teşrîna peyêne de cezaya zîndanî dîyaye Hemşaredarê Miksî Ayvaz Hazirî û 29ê teşrîna peyêne de şaredarîya ma de qeyûm ame cakerdene.

Rena 26ê teşrîna peyêne de çarçewaya operasyonê qirkerdişê sîyasîyî de Hemşaredarê Peyasî Cengiz Dundar û endamê meclîsî û temsîlkarê partîya ma zî tede bi desan kesî ameyî destbendkerdene û badê hîrê rojanê nezaretî 8 hemrayê ma mehkeme de bîlasebeb ameyî tepiştene.

Ewro zî operasyonê qirkerdişê sîyasî de Hemşaredara Dêrsimî Birsene Orhan reyna ameye destbendkerdene. Orhane panc rojî verî amebî destbendkerdene û bi hepsê keyeyî amebî veradayene.

Hetêkî ra mesajê muzakereyê komelkî yenê dayene û hetê bînî ra îradeyê şarî yeno hedefgirewtene. Bi nê caardişan hêvîya demokrasîyî ke şar hesretê ci yo yena çînkerdene. Qiseykerdişan de qala haştîye kenê la pratîk de tewirê dişmenîye mojnenê. Hem şarê kurdî hem zî şarê bînî eşkera vînenê ke şima senî samîmîyetî ra dûrî yê.

Ma do vera nê hêrişanê ke îradeyê şarî nêşarisnenê û tim nê îradeyî hedef genê, dahîna zaf xover bidê û têkoşînê xo yê demokratîkî xurtêr bikerê.