Meclîsê DEM Partî 21ê temmuze de Anqara de kombîyayîşê xo kerdbi. DEM Partî netîcenameyê kombîyyaîşî eşkera kerd. 

Netîcename de dîya zanayene ke konferans de polîtîkayê tecrîd û şerî yê îqtîdarî, krîzo ekonomîk, meseleyê multecî û koçberan, xizanîye û sîyaseto mîyanneteweyî ameyî nîqaşkerdene.

Netîcename de wina ame vatene:

''Îqtîdarê AKP-MHPyî weçînayîşan de derbê giranî werdî. Wina aseno ke bi nameyê 'normalîzebîyayîşî' îqtîdar wazeno ke xo bîyaro pêser la nê polîtîkayê normalîzebîyayîşî zî seba newe ra awankerdişê rejîmê şerê taybetî yê.

Îqtîdar zere û teber de seba çinkerdişê destkewteyanê kurdan xebatan û têkilîyan keno. Nika bi heman hawayî Esadî ra pêvînayîş yeno waştene. Têkilîyê Tirkîya yê bi Iraq, Sûrîye, Îran û hêzanê emperyalîstan teyna seba çinkerdişê destkewteyanê kurdan ê.

Tecrîdê Îmraliyî yê vera Birêz Abdullah Ocalanî seba îqtîdarî sey îqtîdar de mendişî şuxilîyeno. Zîndanan de zî nê polîtîkayê tecrîdî dewam kenê. Îqtîdar bi tecrîd û şerî meseleya kurdan xorin keno û verê çareserîye qefilneno. Ma vera faşîzmî, tecrîd û şerî xoverdayîşê xo pîlêr bikerê. Xora Wan û Colemêrg de vera polîtîkaya qeyûmî hêzê xoverdayîşî ame îsbatkerdene.

Netîceya polîtîkayanê îqtîdarî de rijîyayîşo ekonomîk bi pîlêr. Ma do vera nê rijîyayîşî bernameyê têkoşînê seba kede û edaletî virazê. Naye ra:

-Pêvînayîşê Kede û Edaletî yê ke 19ê temmuze de Mêrdîn de dîyabî destpêkerdene, do dewam bikerê. 

-'Cepheyê Demokrasî û Kede' yo ke xoverdayîşê vera qeyûmanê Wan û Colemêrgî de vejîya werte do bêro hîrakerdene. Erkê ma yo ke ma vra faşşîzmî xeta têkoşînî ya hempare ya şarê Kurdîstanî û Tirkîya awan bikerê.

-Seba xurkerdişê xeta polîtîk-îdeolojîke xebatê ma yê Partîya Dibistane dîyayî destpêkerdene.

-Ma do êlule de Konferansê Rêxistinîya Merkezî û verê cû zî konferansê şaristan û qezayan bikerê û nê armancanê xo pratîze bikerê.''